Rojawan de şayîyê 8ê Adare dewam kenê. Yewînanê Pawitişê Cinîyan (YPJ) bi wesîleya 8ê Adare herêma Firatî de merasîmêko leşkerî kerd.

Şerwanê YPJyî verî rayîrî ra şîyî dima înan merasîmê xo ard ca. Fermandarîya Pêroyî ya YPJyî Sozdare Dêrik merasîm de qisey kerd.

Sozdare Dêrik verî 8ê Adare Roja Cinîyan ê Kedkaran a Rayberê Şarê Kurdî, şerwanan û pêro cinîyan fîraz kerd û şehîdî yad kerdî. Sozdare Dêrik dima derheqê girîngîya 8ê Adare de qisey kerd.

Sozdare Dêrik vat: ''Cinîyî bi hezaran serran o maruzê hêrişan manenê.  8ê Adare vera nê kerdişan vindeno. Ma rê na roje roşan o. Xeylêk cinîyê bêvengî û bêziwanî ewro vera îqtîdarê camêrdîye têkoşîn kenê. Têkoşîn têna pê çeke nê pê rayraşîyayîş, nawnayîş û kombîyayîşan zî yeno kerdene. YPJ heta peynî do vera zorbazîye têkoşîn bikero. Heta ke qet yew cinîya bindeste û rêxistinkerde nêmana ma do têkoşînê xo dewam bikerê. Sozê ma yo tewr pîl zî xelisnayîşê şaristanan ê îşxalkerdeyan o. Seba nê armancî ma do heta peynî do têkoşîn bikerê. Coka pê ruhê cinîyan, pê rengê cinîyan, pê zerrîya cinîyan, pê aqlê cinîyan ma vanê cinîye cuye azadîye.''

Merasîmo leşkerî pê slogananê 'Cinîye, Cuye, Azadîye', 'Biciwîyo Serek Apo', 'Pê can û gonî ma to reyde yê Serek', 'Bê Serek cuye nêbena' qedîya.

Fermandarîya YPJyî pêro beşdaranê merasîmî rê dîyarîyî dayî. Şerwanan pê govendan merasîmê xo qedîna.