Hemserekê Meclîsê Rayberdişî yê Herêma Firatî Mihemed Şahînî ANFyî rê qisey kerd gef û hêrişê dewleta tirke yê vera herêmanê ser o Rojawanî qisey kerd.

Mihemed Şahînî îfade kerd ke AKP Sûrîye de bin kewt û vat: ''Dewleta tirke tim waşt ke Sûrîye de xelayanê Osmanîyan bîyara ca coka xîret kerd ke Sûrîye îşxal bikera la herêmê ke înan îşxal kerdo game bi game  hetê QSDyî ra ameyî xelisnayene. La îşxalê Efrîn, Serêkanîyê û Girê Sipî ra dima dewleta tirke xîret kena ke warê mîyanneteweyî ra tesdîq bigêra, îşxalê Sûrîye rê dewam bikera û hêrişanê xo bizêdîna la no waştişê ci nêame qebulkerdene.

Wextê peyênî de Amerîka û Rûsya wazenê meseleya Sûrîye çareser biba la Tirkîya semedê neçareserîya mesele bi nê hawayî têgêrena. Key Îdareyo Xoser, Meclîsê Sûrîyeya Demokratîke û QSD têgêrayîşêkê dîplomatîkî bikerê dewleta tirke hêrişê Rojawanî kena. Dewleta tirke hêrişanê xo de zêdêr keyeyanê welatperweran kena hedef. Tirkîya wazena pê nê hêrişan şarî bitersna, mîyanê sîstemê Îdareyê Xoserî de alozîyêke peyda bikera û şar Îdareyê Xoserî ra biqerifna. Bi nê hawayî her roje vera îradeyê şarî yê herêmanê Rojawanî gefanê qirkerdişî wanena.''

Şahînî pare kerd ke ê do ewro her wextî ra zêdêr bihêz ê û vat: ''Semedo ke şarê dinya Îdareyo Xoser nas kerdo û qebul kerdo, şar paştî dano ma coka tersê AKPyî qels bîyo û AKP zemînê sîyasetî de binkewtişî reyde têrî bîyo. Coka ganî şarê Rojawanî vera hêrişanê dewleta tirke bibê yew, tewirê xo bimojnê û têkoşînê xo rê dewam bikerê. Bi îradeyê şarê ma netîceyêka serkewte do bivisnê destî.''