Vervatoxa Hemserekîya Îdareyê Xoserî yê Rojawanî Emîne Osê hêrişê dewleta tirke yê vera Şingal, Mexmûr, Herêmanê Pawitişî yê Medya û Rojawanî ercnayî û pare kerd ke nê hêrişê dewleta tirke dewamê projeyanê DAÎŞî yê.

Emîne Osê ard ziwan ke dewleta tirke rayberîya AKPyî de sey DAÎŞî hêriş kena û vat: ''Heman hêrişê DAÎŞî hetê dewleta tirke ra yenê kerdene. Ganî rayaumûmî na mesele de hîsger biba. Dewleta tirke wazena xeyalê xo yê îşxalê Rojhelatê Mîyanênî bîyara ca. Dewleta tirke dima ke Serêkanîyê, Girê Sipî û Efrîn îşxal kerdî, pêro herême îşxal kerde. Eke hêzê mîyanneteweyî têbigêrê û komîsyonêk awan bikerê dewleta tirke bêra hukmkerdene. Serewedaritişê şarê Girê Sipî nîşanê nê sûcan o. Cinîyan rê hêrişê cînsî yenê kerdene, cinîyî yenê remnayene. La rixmo ke delîlê nê kedişan estê, dezgehê mîyanneteweyî vera ci nêrazîbîyayîşê xo nêmojnenê.

Efrîn de cinîyê ke kişîyayî, bedenê înan bi hawayêkê rûtî yenê mojnayene. Ganî vera ney qîyamet bêro ronayene. Labelê bêvengîya rayaumûmîya mîyanneteweyî û rêxistinanê cinîyan ê mîyanneteweyîyan kerdişanê dewleta tirke û cerganê ci meşrû kena.  Serê herême de ambargo esto. Her kes baş zaneno ke Îdareyo Xoser seba cewabdayîşê hewcedarîyanê nê şarî zaf xîret keno. La dewleta tirke hema zî hêrişê axpînanê  herême kena. Nê kerdişan ra zî seba ke bêveng ê hêzê mîyanneteweyî berpirsîyar ê.''

Emîne Osê da zanayene ke hêzanê mîyanneteweyîyan hêrişê vera Mexmûr, Şingal û Herêmanê Pawitişî yê Medya tesdîq kerdî û vat: ''Coka ganî cade yewîya kurdan bêra awankerdene. Çarenusê kurdan û ameyoxê înan seba menfaatanê hêzan ê herême yenê qurbankerdene.  No proses prosesêko tarîxî yo û ganî kurdî nê prosesî de yewîya xo awan bikerê. Hewceyê şarî pê ney esto. Rewşa parçebîyaye ya kurdan bena sebeb ke kurdan ser o bazarîye bêra kerdene. Coka ganî ma seu kurdan pê berpirsîyarîye têbigêrê.''