Fonê Hetkarîya Domanan ê Neteweyanê Yewbîyayeyan (UNICEF) dewleta tirke ya ke Serêkanîyê îşxal kerde bi rojan o nêverdana ke awe îstasyonê awe ra vila biba.

Eşkerayîye de ame parekerdene ke îstasyonê awe yê Elokî de ke nêzdîyê Serêkanîyê yo, destûr nêno dayene ke awe herêmanê QSDyî de vila biba. Yeno vatene ke  eleqeyê astengkerdişê awe bi Anqara esto.

Temsîlkarê Sûrîye yê UNICEFî Fran Equîza da zanayene ke birnayîşê awe sere de seba cinîyan û domanan seba pêro şarê herême rîskêko pîl o. Equîza arde ziwan ke na rewşe nêna qebulkerdene.

Equiza polîtîkaya gemarine ya dewleta tirke bi xurtî rexne kerde û vist vîrî ke bi nê hawayî cuya merdiman rê gef yeno werdene. Temsîlkarê UNICEFî vat: ''Çimeyê awe ganî seba destkewteyanê sîyasîyan û leşkerîyan nêrê xebitnayene.''

Îstasyonê awe yê Elokî yo ke dewleta tirke kena hacetêkê polîtîkaya xo yê vera merdimîye, awe resena şaristanê Hesekê, Kampa El Holî. 460 hezar merdimî hewceyê awa îstasyonî yê.

Ambargoyê awe reyde rîskê vilabîyayîşê vîrusê Korona zî beno semedê qesawetan.