Şebekeyêko bîn ê sûcî yê dewleta Tirkî yê Sûrîye vejîya werte. Şebeke, dimayo ke bazirkarê merdiman ê bi nameyê Şahab Ahmed Abdullatîf gama ke ame Vakurê Sûrîye û hetê QSD’yî ra ame tepiştene vejîya werte.

Şahab Ahmed El Abdullatîf serra 1984 de Hecîn de ame dinya. Demêkê mendişê Lubnanî ra dima, wexto ke Hecîn kewt destê OSO’yî agêra Hecîn. Mabênê herêmanê rejîmî û Hecînî de qaçaxîya petrolî, mazotî kerde. Serra 2015 de bajarê Hecînî yê herêma Dêra Zor ra ravêrt bi Tirkîya. Çeteyê DAÎŞ’î berdê sînorê Tirkîya-Sûrîye. Belgeyê ke telefonê Şahabî de yê ramojnenê ke çi kar kerdo û kamî dir têkilîya ci esta.

Şahab ano ziwan ke serra 2017 de bi kemîbîyayîşê karê qaçaxçîye dest bi karê transfere pereyan keno, seba nê zî dikanêk xo rê akeno. Şahab vano, “Dikanêk mi zî Hecîn de estbi. Pereyî serê merdimêk min o ke Hecîn de bi ra ameyêne hewilnayene. Seba ke telefonê ê girewte bi, kesanê ke waştêne perayanê xo bihewilnê rasterast ro mi gêrayêne. Bi rayîrê hemparanê min ê Fransa, Almanya, Swêd, Belçîka û Îngilîstanî pereyî ameyêne, mi zî ê pereyî bi rayîrê hemparanê xo yê Dêra Zor û Hecînî resnayêne DAÎŞ’î.”

Şahabî ard ziwan ê dikanê bi nameyê El Beyanî de Sûrîyeyijê bi nameyê Îbrahîm Abdul El Mûstafa (Ebû Sûça) û Omer Mûhammed Kadîr şinasnayê û înan dir xeylî karê leyminî kerdê. Şahabî vat, “Ameyî mi het de. Vat ke do pere bieşrawê Hecîn. Dima ra vat babetêka bîne esta û ancî ameyî. Ganî çend cinîyê Êzidîyî biameyêne remnayene bi Tirkîya. Mi Ebû Sûçayî dir pê kerd. Mi di cinîyê Êzidîyî Dêra Zor ra berdî Til Ebyad. Ûca ra tepîya do yewna qaçaxçî biardêne. Labelê QSD’yî tepişt. Berdişê cinîyanê Êzidîyan ê bi Tirkîya de ez tena mabênkar bîya. Ez bi rayîrê hemparê xo Ebû Îmadî mûsaya ke Ebû Sûçayî do ê cinîyî bi vayayêka pîle birotêne.

Şahab zimistanê serra 2017’î de destpêk de ‘Mucadeleyê Hemverê Terorî’ (TEM) yê awanîya Mudurîya Asayîşî ya Karakopru ya Riha de, dima zî bi Organîzasyonê Îstîxbaratê Tirkî (MÎT) têkilî roneno. Şahabî ard ziwan, sere de binê çimdarîya MÎT’î de pereye DAÎŞ’ijan hewilnayê, dima ra zî MÎT û TEM’î ê ra waşto ke DAÎŞ’îyan ravêrno bi Tirkîya.

Şahab Ahmed El Abdullatîf ano ziwan, Mudurîya Asayîşê Karakopru de înan gefî bi ê wendê û vat, “Înan vat, yan ti do Tirkîya ra vejîyê, yan bêrê tepiştene yan zî ma dir bixebetîyê. Ez zî înan dir xebetîyaya. Ez îstîxbaratê Asayîşî dir xebetîyaya. Mi nameyê ê kesanê ke pereyî şirawitêne bi Hecîn û Hecîn ra pereyî şirawitêne dayêne înan.”

Endamê bînî yê şebeke Omer Kadîr Muhammed û Îbrahîm El Mûstafa yê Sûrîyeyijî ke Mît û Asayîşî dir xebetênê, yeno vatene ke hewna Riha de yê.