PYDyî ra vera îşxalî hamleya xoverdayîşî ya bêdeme

Partîya Yewîye ya Demokratîke (PYD)  Herêma Firatî de hanleyêka newîye daye destpêkerdene û vat: ''Çarçewa hamle de do vera îşxalan û dişmenanê Rojawanî têkoşîn bêro kerdene.''

Partîya Yewîye ya Demokratîke (PYD)  Herêma Firatî de hanleyêka newîye daye destpêkerdene. Meclîsê Herêma Firatî yê PYDyî Kobanê de eşkerayîyêke daye. Meclîsî pare kerd ke înan bi şîarê 'Dewleta tirke ya îşxalkere rê nê, pawitişê destkewteyanê şorişî rê heya'' hamleyêka newîye daye destpêkerdene.

Bi desan endamê partîye tewrê eşkerayîye bîye. Eşkerayîye hetê Hemserekê Meclîsê Herêma Firatî Ehmed Şêxî ra ameye wendene.

Eşkerayîya PYDyî wina ya:

''Ma seba ke cayanê îşxalkerdeyan bixelisnê bi şîarê 'Dewleta tirke ya îşxalkere rê nê, pawitişê destkewteyanê şorişî rê heya' Herêma Firatî de hamleyêka newîye daye destpêkerdene.

Hamle armanc kena ke rûmet, komel, tarîx, cuya azade û destkewteyanê ma bipawê.

Çarçewa hamle de; vera îşxalan û dişmenanê Rojawanî têkoşîn do bêro kerdene. Hêzê ma yê komelkî û kulturelî do bêrê rêxistinkerdene. Xoverdayîşê pasîfî ra do derbazê xoverdayîşê hemparî bêro kerdene.

Hamleya ma hamleya xoverdayîşê komelkî, rêxistinkî, sîyasî û sivîlî ya.

Hamleya ma hemleya neteweyî û demokratîk a.

Na hamle seba wextêkî nîya; hamle heta ke heqê şarê ma hetê qanûnanê mîyanneteweyîyan ra bêrê pawitene do dewam bikera.

Polîtîkaya dişmenkarîye ya dewleta tirke kerd ke a pêro waran de têna û mîyanê krîzî de bimana. Na polîtîka do dewleta tirke çin bikera. Hamleya ma do nê çinkerdişî bikera lezêr.

Hêzê hegemon û sîyasî yê mîyanneteweyî kenê ke cografya û xerîteyanê neweyan xêz bikerê la heqanê kurdan nêşinasnenê. Nê esasî ser o ma do bi hêzê xo, sîyasetê xo û îradeyê xo hedefê xo bîyarê ca û heqanê xo yê meşrûyan bigêrê binê garantî.

Hamleya ma seba azadîya şarê ma garantî ya. Na hamle ganî  seba yewîya netewîye ya kurdan a Rojawan biba hêzê paştdayîşî.

Ma venga pêro partî, dezgehan, komel û cinîyan ê Rojawanî danê ke tewrê hamleya ma bibê. Seba ke hemle ser bikewa ganî ma bi ruhê Rayber Apo, Kobanê û xoverdayîşê Heftanînî têkoşîn bikerê.''