Partîyanê Yewîya Neteweyî ya Kurdan û Encumena Neteweyî ya Kurdan a Sûrîye derhe qê pêvînayîşanê seba yewîya neteweyîye eşkerayîyêka hempare daye.

Eşkerayîye wina ya:

''Heyetanê Encumenê Neteweyî yê Kurdan ê Sûrîye (ENKS) û Partîyanê Yewîya Neteweyîye ya Kurdan (PYNK) pêvînayîşê 16ê hezîrane reyde safha verêne ya dîyalogê seba caardişê yewîya neteweyî ya kurdan temam kerde. Heyetan têgêrayîşêkê sîyasî yê hemparî ser o pêkerd û madeyê Peymana Duhokî ya 2014an (Îdare, Hemkarî, Asayîş û Pawitiş) sey bingeyê pêvînayîşanê mabênê her di heyetan ameyî qebulkerdene. Wextêkê kilmî de peymana pêroyî ya newîye do bêra îmzakerdene.''
Her di heyetan bale ante hemkarî û yewîya kurdan a Sûrîye ser û îfade kerd ke peymane seba şarê Rojawanî bîye gamêka tarîxîye û do menfaatanê şarê kurdî bipawa.

Her di heyetan da zanayene ke na game netîceya têkoşînê şehîdanê û gazîyanê Rojawanî û keyeyanê înan de ameye eştene. 

Eşkerayîye wina dewam kena: ''Na peymana ke ma binê çimdarîya Serfermandarê Pêroyî yê Hêzanê Sûrîyeya Demokratîke (QSD) Mazlûm Ebdî û Şêwirmendê DYA yê Koalîsyonê Mîyanneteweyî William Robakî de kerde, bîye gama yewine ya tarîxî ya yewîya kurdan. Seba înîsîyatîfê ci yê seba caardişê yewîya kurdan a Sûrîye ma Birêz Mazlûm Ebdî rê sipas kenê. Reyna seba paştdayîşê ci ma Mesûd Barzanî û Serekê Herêma Başûrê Kurdîstanî Nêçirvan Barzanî rê sipas kenê. Ma DYA rê zî sipas kenê ke seba awankerdişê Sûrîyeyêka pirrenge û demokratîke paştî dana.''