Vera hêrişê îşxalî yê dewleta tirke yê vera Başûrê Kurdîstanî Qamişlo de ''Meşa Rûmetê'' ame kerdene. Rayraşîyayîşo ke bi des hezaran kesî tewrê ci bîyî bi mîtîngêk qedîya.

Qamişlo, Dêrik, Rimêlan, Girkê Legê, Çilexa, Tibesipîyê û Hesekê ra bi des hezaran kesî tewrê ''Meşa Rûmetê'' bîyî xeylêk partîyanê sîyasîyan û dezgehanê sivîlîn zî paştî daye rayraşîyayîşî.

Verê rayraşîyayîşî hetê endamanê Têgêrayîşê Huner û Kulturî yê Mezopotamya ra govend ame girewtene.

Çalakwananê ke flamayê HPG, YJA Star, Kongreya Star û PYDyî û posterê Rayberê Şarê Kurdî Abdullah Ocalanî kirişîtî pankartê ke ser o "Li dijî dagirkerî û xiyanetê meşa rûmetê", "Bijî berxwedana gerîla", "Bê serok jiyan nabe"  û "Gerîla pêşeroj û rûmeta Kurdistanê ye" nuşte bî akerdî.

Rayraşîyayîşo ke serê rayîrê Amûdê de pê rêzgirewtişî dest pê kerd pê selamkedişê xoverdayîşê gerîlayanê HPG û YJA Starî dewam kerd. Badê  rayraşîyayîşî mîtngêk ame kerdene.

Tîya verî dayîka gerîla Xelîye Eyup qisey kerd. Eyube vera hemkarîya PDKyî ya bi dewleta tirke hersê xo ard ziwan û vat: ''Ê vera heme hêrişan û xayînîye paştî danê gerîlayan'' Eyube bêvengîya hêzanê mîyanneteweyî zî şermezar kerde û vat ê sey şarî do xoverdayîşê xo rê dewam bikerê. Eyube vat: ''Ma ewro xeyrê gerîlayan û xoverayîşê biheybetî yê koyanê Kurdîstanî tîya de yê. La dinya na raştîye rê çimê xo girewtî. Faşîstan planê leymînî fînayî dewre. Wazenê ma qir biker. La wa her kes bizano ke ma do vera heme hêrişan xover bidê. Gerîla semedê pawitişê şaranê bindestan xoverdayîşo biheybet keno. Tay hemkarî herinda ke kişta gerîlayan de ca bigêrê paştî danê hêrişê îşxalî. Ganî vera hêrişan ma sey kurdan pêro pîya têbigerê.''

Hetkarê Hemserekanê Meclîsê Rayberdişî yê Îdareyê Xoserî yê Rojawanî Hesen Koçerî zî vat: ''Demografîyê Efrîn, Girê Sipî û Serêkanîyê yeno bedilnayene la hêzê mîyanneteweyî têna nayî seyr kenê. Waştişê înan oyo ke îradeyê şarê ma bişiknê. Ganî partîyê kurdan destûr medê  pêrodayîşê waybirayî. Kesê ke gonîya waye û birayê xo birişno tarîx do bêro lanetkerdene. Hedefê hêrişê vera Başûrê Kurdîtanî de têna gerîlayî nê heme kurdî estê. Wextê referandumî de tewirê dewleta tirke eşkera werte de bi. O wext zî PKK estbî?  Dişmen wa bizano ke kurdî hinî sey verî nîyê.  Ma vera hêrişanê qirkerdişî xover danê. Hêzê kurdan esto. Fedayîyê ci estê. Ma do ser bikewê.''

Endamê Koordînasyonê Kongraya Starî Asya Abdullah zî mtîng de qisey kerd. Abdullah pê selamkerdişê xoverdayîşê gerîlayan dest pê qiseykerdişî kerd û vat no xoverdayîş do miheqeq ser bikewo. Abdullahe vat: ''Na çalakîya ewro de tewirê kurdan reyna ame vînayene. Tîya vera îşxal û qirkerdişî mesajê yewîya neteweyîye dîya. Wazenê şarê ma bixapînê la ma zanê no hêriş têna vera PKKyî nêyo. Ma ganî têkoşînê hemparî bidê. Eke PDK nêeşkenê têkoşîn bikero wa xo bido kişt û paştî medo dişmenî. PDK keno ke şerê zereyî yê kurdan vejo. Ma nêwazenê ke pêrodayîşê waybirayî biciwîyê û bivînê. Şêro winayên de têna verê dişmenî akeno. Ê eşkenê xo zafêr Kurdîstan de ca bikerê. Eke hêzê Başûrê Kurdîstanî nêwazenê mabênê kurdan de şer bivejîyo wa cadê hêzê xo ke waranê gerîlayan de ca kerdî peyser biancê. Wa çew/e kayanê Erdoganî rê mexapîyo. Nê hêrişê îmhayî yê vera kurdan ê.bGanî vera nê hêrişan heme têgêrayîşê kurdan binê serbanê yewîya neteweyîye de bêrê têhet.''