Hêzanê Sûrîyeya Demokratîke (QSD) serrgêra 2. ya azadkerdişê Baxozî de şayîye organîze kerde. Merasîmo ke xeylêk şerwanî û rîsipîyî tewrê ci bîyî de bi nameyê QSDyî Fermandaranê Meclîsê Leşkerî yê Şedadê ra Tomutani Sayil El-Zobeiyî  qisey kerd.

El-Zobeiyî  vat: ''Ma sey QSDyî 7 serrî yo vera çeteyanê DAÎŞî têkoşîn kenê. Ma Kobanê, Minbic, Tebqa, Reqa û tewr peynî de Bazoz de hemleya azadkerdişî daye destpêkerdene.  Pê bedelanê pîlan ma waştişê şarê xo ard ca û Baxoz azad kerd. Nê 7 serran de bi hezaran şerwanê ma seba ke tarîtîya DAÎŞî biqedînê bedenê xo kerdî mertal û DAÎŞ binkewt. Heme vera çeteyanê ke mendî têkoşînê ma dewam keno. Zaf grûbê çeteyanê radîkalî estê ke binê tesîrê DAÎŞî de yê. Nê çeteyî hêrişê ma, rîsipîyan û Îdareyê Xoserî kenê.''

El-Zobeiyî  bale anete hemkarîya DAÎŞ û Tirkîya ser û vat: ''Dima ke dewleta tirke Serêkanîye û Girê Sipî îşxal kerdî DAÎŞ herême de ganî bi. No zî tekîlîya dewleta tirke û DAÎŞî fîneno çiman ver. Dewleta tirke nê çeteyan rêxistin kena ke hêrişê  herra ma bikerê. Çeteyanê xo şawenê Lîbya, Azerbaycan û Yemenî.''

El-Zobeiyî  çeteyê tepişteyî û keyeyê înanê ke Kampa Holî de manenê sey tehlukeyê pîlî name kerdî û vat: ''Îdareyê Xoserî zaf rey waşt ke wa mehkemeya mîyanneteweyîye bêro ronayene  la hema zî cewabêk nêame dayene''

El-Zobeiyî  vist vîrî ke operasyonê înan ê vera hucreyanê DAÎŞî dewam kenû vat: ''Semedê qedînayîşê DAÎŞî metodê cîya cîya estê. Hêzê komelkî û leşkerî eşkenê nayî pîya bikerê. Dewlete herêmî û mîyanneteweyî ganî semedê çeteyanê tepişteyan û keyeyanê înan  ke kampan de mananê berpirsîyarîya xo bîyarê ca. Reyna ganî paştî bidîyo Îdareyê Xoserî. Gama ke her kesî xo peyser ant Îdareyê Xoserî vera nê çeteyan şer kerd.''

El-Zobeiyî  qiseykerdişê xo wina qedîna: ''Ma do rêça şehîdanê xo de şar, destkewteyan û erdê xo bipawê. Ma soz danê ke sîstemê Îdareyê Xoserî ke semedê heme şaranê Sûrîye sîgortaya pîya ciwîyayîşê bawerîyan a, ma do bipawê. Ma do Sûrîye terorîstan ra pak bikerê.''