Fermandarîya Hêzanê Sûrîyeya Demokrate (QSD) bi wesîleya sergêra serkewtişê vera DAÎŞî eşkerayîyêka nuştkîye daye û nê pare kerdî:

''Ma sey Fermandarîya Pêroyî ya QSDyî sergêra serkewtişê vera DAÎŞÎ yo ke 23ê adar a 2019î ame îlankerdene fîraz kenê. Xoverdayîşê ma pîya bi hemkarîya Koalîsyonê Mîyanneteweyî vera DAÎŞî  merhaleyo newe de dewa keno. Bado ke operasyonê ma yê leşkerî yê vera rêxistina terorî qedîyayî têkoşînê ma yê derheqê tepişteyanê DAÎŞî û merdimanê înan ame xurtkerdene.Vera hucreyanê mîyanan ê çeteyan 350 çalakîyî ameyî kerdene û 376 terorîstê DAÎŞî ameyî tepiştene. Nê hemkarîya ma de çalakîya tewr pîle vera serçeteyê rêxistina terorî Ebubekir El Bagdadî û serçeteyanê bînan bî. Seba ke hetkarîya mîyanneteweyî çîna semedê tepişteyanê DAÎŞî û merdimanê înan ma tengayî ancene. Reyna bi seyan kesê ke hetê çeteyan ra ameyî remnayene ma semedê înan zî rayapêroyî ra hetkarî pawenê.

Destpêkerdişê hêrişê îşxalî yê dewleta tirke yê vera Serêkanîyê û Girê Sipî operasyonanê ma yê vera DAÎŞî ser o tesîro xirab kerd. Tayî hêzê ma mecbur mendî ke cayê xo bibedilnê. Hêzê Koalîsyonê Mîyanneteweyî zî rojawanî ra ancîyayî. Herêmanê sey Reqa, Mincib, Tebqa Girê Sipî de operasyonê vera DAÎŞî ameyî kêmkerdene. DAÎŞî zî no sey firsendî dî û reyna dest bi xo rêxistinkerdişî kerd. La hêzanê ma yê ke pabesteyê Îdareyê Xoserî yê semedê îstîkrar û asayîşê herême mudaxaleyê înan kerd.Reyna ma îspat kerd ke tay çeteyê verêne ke DAÎŞî de ca girewt îşxalê Serêkanîyê û Girê Sipî de ca girewt. No semedê heme herêman tehluke yo. Ganî rayapêroyî ya mîyanneteweyî naye ser o vinderê û semedê kesanê ke erdê xo ra vejîya reyna agêrê erdê xo bigurîyo.

Ewro binkewitşê DAÎŞî serrêke xo dima verda la seba ke hema tehluke dewam keno ganî tedbîrê ma zî dewam bikerê. Seba ke temsîlkarê herêmî dîyaloganê mîyanneteweyî ra dûrî yenê tepiştene tehlukeyê DAÎŞî reyna agêreno. Rêxistina ke hetê leşkerî û ekonomî ra bihêz a kasosî ra eşkena reyna bibo ganî. Ma temînatê Sûrîyeya azade vanê ke Sûrîye de destpêkê prosesê sîyasîyî do bibo peynîya DAÎŞî.''