Merkezê Îrbatî û Çapemenîye yê QSDyî derheqê hêrişanê dewleta tirke yê vera Til Temir û Zîrganî de eşkerayîye daye û nê vatî:

''Çeteyê ke pabesteyê artêşa tirke ya îşxalkere yê 21ê kanûne de pê topan hêrişê Til Temirî kerd. Netîceya cewabdayîşê yewîyanê Meclîsê Leşkerî yê Til Temirî de hêriş ame şiknayene. Artêşa tirke û çeteyanê ci pê topan hêrişê bajarekê Zîrganî û dewanê ci yê Til Temirî kerd. Hêrişan de dewê Um Işbê, Dawûdiyê , Eyin El Hewa, Rebîat, Esediyê, Hemra, Ezîziyê, Um El Kêf, Til Şinan, Tewîla, Til Tewîl, Til El Werid, Bobe, Xedrawî, Bisîs Foqanî ameyî hedefgirewtene.

Hêrişanê 21 û 22ê kanûne de 4 hemwelatîyanê ma dinyaya xo bedilnaye û 14 hemwelatîyê ma zî birîndar bîyî. Reyna 3 leşkerê rejîmê Sûrîye birîndar bîyî. 22ê kanûne de dormeyê dewa Um El Kêfî de mabênê hêzanê ma û çeteyan de pêkewtiş qewimîya. Netîceya pêkewtişî de 3 çeteyî ameyî kiştene.

Wezîrîya Pawitişî ya Tirkîya ya îşxalkere eşkerayîya xo de îdîa kerd ke 22ê kanûne de 10 û 23ê kanûne de 2 şerwanê ma şehîd bîyî. Nê eşkerayîyan ra yeno vînayene ke dewleta îşxalkere sîvîlê ke hêrişanê ci de şehîd  û birîndar benê sey şervananê ma ramojnena. Dewleta tirke bi xeberanê zûran kena ke rayapêroyîye û çapemenîye dinya bixapîno û hêrişanê xo sey meşrûyî ramojno. Senî ke ma vat êyê ke hêriş kenê û şertenaê şerî binpay kenê dewleta tirke û çeteyê ci yê.''