Fermandarîya Pêroyî ya QSDyî qirkerdişê dewa Sefawîyê şermezar kerd û venga komelê mîyanneteweyî da ke binpaykerdişê heqanê merdiman ê ke Tirkîya kena teqîb bikero. QSD vat ke Tirkîya şer de israr kena.
Vizêr dewa Sefawîyê ya Eyn Îsayî de heman keyeyî ra 4 kesî, dadî û kênaya xi ameyî qetilkerdene. Fermandarîya Pêroyî ya Hêzanê Sûrîyeya Demokratîke (QSD) derheqê mesele de eşkerayîyêke daye.
Eşkerayîya QSDyî de wina ya:
''Dewleta tirke pê sûcêkê neweyî sûcê xo yê vera şarê Rojawanî zêdînayî. Tankanê dewleta tirke vizêr dewa Sefawîyê ya Eyn Îsayî de sivîl û koçberê Girê Sipî dayî bombayan ber. Netîce de keyeyêkî ra 4 sivîlî merdî ke 3ê înan doman bîyî.
No sûco barbar eşkera keno de dewleta tirke şer de israr kena û koçkerdişê roniştoxanê herême rê dewam kena ke herêmanê bînan ê Sûrîye zî îşxal bikera. Dewleta tirke bi nê hawayî peymananê verênan zî binpay kena.
Ma nê sûcî şermezar kenê. Ma keyeyê qurbananê qirkerdişî û şarê xo rê serweşîye wazenê. ma venga garantor Rûsya danê ke mesuldarîyanê xo wa bîyara ca û binpaykerdişanê dewleta tirke vindarna. Ma raşt kenê ke ma do heqê xo yê pawitişê meşrûyî û pawitişê şarî û herêmanê xo bîyarê ca. Ma venga komelê mîyanneteweyî danê ke binpaykerdişanê heqanê ke hetê dewleta tirke ra yenê kerdene teqîb bikerê û sûcdaran teslîmê mehkemeyanê mîyanneteweyîyan bikerê.''
