Hetkara Hemserekanê Meclîsê Rayberdişî yê Îdareyê Xoserî Emîne Osê bi wesîleya serrgêra 10. ya Şorişê Rojawanî ANFyî rê qise kerd.

Emîne Osê vist vîrî ke Şorişê 19ê Temmuze Kobanê de herêmanê kurdan de dest pêkerd dima vilayê herêmanê bînan ê sey  Girê Spî, Minbic, Tebqa, Reqa û Dêrazorê bi. Osê vat: ''Her ke roşnîya şorişî bîya pîl hêrişê vera şorişî zî zêdîyayî.''

Osê vist vîrî ke dewleta tirke verî 2018-19 de hêriş kerd û Efrîn Girê Sipî û Serêkanîyê de xoverdayîşêko pîl ame kerdene. Osê vat: ''Nê hêrişanê leşkerîyan reyde vera herême hêrişê ekonomîkî zî est bîyî; sînorî qefilîyayî, berê bazirganîye qefilîyayî, abargo ame caardene. Nê pêro seba çinkerdişê Îdareyê Xoserî bîyî. Dewleta tirke her hetî ra xîret kerd ke statuyê Rojawanî çin bikera. Hetê siyasî, dîplomatîk, leşkerî û komelkî ra bi her hawayî hêriş ame kerdene.

Rixmê hende hêrişan zî nê 10 serran de şorişî xo mîyan de şorişêk kerd, vurîya û vurna. Bi taybetî cinîyan xo aver berd, perwerde kerd. Cinîyî her roje hîna zaf mîyanê Îdareyê Xoserî de ca bîyî û sîstemê hemserekîye ame caardene. Nê pêro destkewteyê şorişî yê. Seba ke Îdareyo Xoser Rojhelatê Mîyanênî de sey sîstemê mîsalî ame dîyene hêrişê vera ci nêqedîyayî. Erdogan seba çinkerdişê Îdareyê Xoserî xo rê gêra şirîkan. Erdogan têna vera Rojawanî gefan nêwaneno hetê dîplomatîkî ra hertim bazarîye keno û keno ke verî verê nêrazîbîyayîşan bigêro.

Îdareyê Xoserî pawitişê şarî sey wezîfeyê xo dî. Nika zî vera gefanê îşxalî pawitişê şarî xo rê sey wezîfeyî vîneno. Îdareyê Xoserî rewşa îstîsnayîye îlan kerde. Nika tecrubeyê ma yê Efrîn, Girê Sipî û Serêkanîyê est ê. Dewleta tirke têna vera QSDyî do şer nêkera. Narey şarê Rojawanî zî verê xo de bivîna. Eke vera Rojawanî hêriş bêro kerdene pêro şarê Rojawanî mîyanê xoverdayîşî de do ca bigêrê.''