Xoverdayîşê Serzûrî sey 'rîpelê verênî yê xoverdayîşê Kobanê' şinasîyena. Xoverdayîşê Serzûrî mojna şar ke mumkîn o ke DAÎŞ bêra çinkerdene. 

Kobanê 11 mengan binê ablûqaya DAÎŞî de mende. 13ê êlule de seferberîye ameye îlankerdene û şer dest pêkerd. Dewleta tirke sînorê xo qefilna û cergê DAÎŞî pê cebilxaneyan sînorî ra derbaz bîyî. No şer têna şerê DAÎŞî nê şerê dewleta tirke yê vera kurdan bi. La kurdê Vakurî vera ney vindertî û verê xo da xoverdayîşî.  Şewa 15ê êlule şero pîl dest pêkerd.DAÎŞî 3 baskan ra hêrişê Kobanê kerdêne. Mabênê şerwananê YPG/YPJ û cerganê DAÎŞî de 16ê êlule de dewanê Talik, Cibil El Ferec, Durguman û Borazî de şer qewimîya. Rojhelatê herême de zî dewanê Serzûrî, Cirin, Kopirlik, Bîrkêtik, Saronc û Qizelî de şerêko giran qewimîyayêne. DAÎŞî rixmê îmkananê x derbê giranî werdî.

Dewa Serzûrî rojhelatê Kobanê de ya û cayêko stratejîk a. Eke DAÎŞ tîya bivisno destî eşkeno pêro rojhelatê herême kontrol bikero, dewleta tirke hîna rehet hetkarîya ci kena û şerwanî sînorê Vakurî ra dûrî kewenê. Eke 12 şerwananê Serzûrî xo ver nêdayêne Serzûrî bikewtêne DAÎŞî sivîlê herême qir kerdêne. 

12ê şerwanan binê fermandarîya Rodî Efrîn û peymane Tolhildan de bira xo dabî. Cergî 15ê êlule de saete 03:00 de resayî dewa Serzûrî. Cepheyê rojhelatî yê Serzûrî de verî 7 şerwanî estbîy dima hûmara înan bîye 10. Rixmê hêriş û bombardumanan nê cergî resayî dewe û tewrê xoverdayîşî bîyî. Çend saetan ra dima DAÎŞî pê 3 tankan û tay çekanê giranan eşt dewe ser. Şerwanî zî dewe de rêxistin bîyêne la hûmara înan zaf tay bîye. Çend saetanê bînan ra dima fermandaranê şerwanan waşt ke şerwanî xo apey biancê la şerwanan no qebul nêkerd. Semedo ke DAÎŞ pêro dewe îşxal nêkero înan bi saetan xo ver da. Cergan vatêne qey bi hezaran şerwanan vera înan şer kerdêne. La têna 12 şerwanan pê çekanê sivikan şer kerdêne û cebilxaneyê înan hê qedîyayêne.

Wexto ke Fermandarîya Herême waşt le paştdayîş bişawo dewe Fermandar Rodîyî cîhazî ra wina vat: ''Kes meşawê tîya wa embazî hînî şehîd nêbê. Dişmenî dormeyê dewe girewto. Eke ma nêeşkê xo bixelisnê wa embazî bikewê dewe. Ma do heta peynî şer bikerê. Eke şehîd zî bikewê ma do pê sereberz bibê.'' Heman wext de vengê tilîlîya şerwanan ameyêne. Her tilîlîya înan de cergê DAÎŞî zêdêr hêrs û har bîyêne.

Şerwanî dima ke şer hîna giran bi dekewtî dibistana dewe. 3 tankî nêzdîyê dibistane bîyî, dima kewtî baxçeyê dibistane. Cergan pê doçka, çekanê BKCyî û bombayan eştêne dibistane ser. La şerwanan nêverdêne cergî debikewê zere. Fermandarîya Herême cîhazî ra têkilîye viraştêne. Şerwananê dibistane vatêne 'Se beno wa bibo wa xoverdayîş dewam bikero.' DAÎŞî zî cîhazî ser o semedê teslîmbîyayîşî venga şerwanan dayêne. La şerwanan vatêne: ''Ma şerwanê Rayber Apoyî yê, qetî teslîm nêbenê. Şima do nêeşkê Kobanê îşxal bikerê. Ma milîtanê partîya şehîdan ê. Ma şehîd bikewê zî têkoşînê ma do dewam bikero.''

Fermandarîya Herême bi israrî waştêne şora dewe. Dima ke fermandarîye xoverdayîşê şerwanan dî neçare mende ke kanala bêtele bivurna û kanalêka taybete abikera. (Kanala 5. Na kanale semedê şarî sembola xoverdayîşê Serzûrî ya.) Şerwanê ke waştêne debikewê dewe nêeşkayî ablûqa ra derbaz bibê. 

Şerwananê Serzûrî vera DAÎŞî xoverdayîşêko pîl mojna. 12 şerwanan bi moral û coşî şer kerdêne. DAÎŞ nêeşkayêne debikewo sibistane. Şerwanan heta peynî cîhazî ser o Fermandarîya Herême de qisey kerd.

Fermandare Peymane: Ez do destûr nêda ke cergî destê xo bierzê sereyê mi. Ma pê huyayîşî ver bi şehadetî şinê. Bawerîya ma hema zî zêde ya. Ma pê bawer ê ke çeka ma do erdî ser o nêmana. Embazî çeka ma do bigêrê û qesasê ma bigêrê.

Fermandar Rodî: Teslîmîyet bêrûmetî ya. Ma do qetî ney qebul nêkerê.

Ciwan Heval: Ez bi çêrî tewrê şorişî bîya û wazena bi çêrî şehîd bîya. Embazan rê vajê ke ez nêeşkaya pêro wezîfeyanê xo bîyara ca coka şima ra uzrê xo wazena. Mi tim waşt ke ez biba milîtanê Rayberîye la ez nêeşkaya kesayetê xo bi temamî bikera kesayetê partîye. Coka rexneyanê xo dana.

Şerwananê bînan zî heman çîyî ardêne ziwan û uzrê xo waştêne. Înan vatêne: ''Eke ma kêmasîyêke kerda embazan ra uzrê xo wazenê. Wa embazî ma efû bikerê.''

Mîyanê xoverdayîşê 36 saetanê zêdêran de 100 cergê DAÎŞî kişîyayî. DAÎŞî qato verên rijna û adir verda dibistane, pê bombayan destî zî xîrey kerd ke verê xo abikerê.Şerwanan nêverda ke DAÎŞ bireso qatê diyînî. Dima ke cebilxaneyî qedîyayî cergan çekê xo şikitî, dima zî bîyî çember û verar şîyî yewbînan. Tewr peyên cîhazî ra vengê înan wina eşnawîya: ''Ma deyndarê şarê xo, deyndarê welatê xo yê, deyndarê xoverdayîşê Kobanê yê, destûr medê dişmen bikewo Kobanê.''

Vengê pîmê bomba ra dima têkilîya fermandarîya bi şerwanan birîyaye. 16ê êlule de saete 16:30 de 12 şerwananê şarê kurdî; Rodî Efrîn, Peymane Tolhildan, Baran Perwer, Ciwan Heval, Rustem Cûdî, Gulîstane Qendîl, Mizgîn Cûdî, Hebûn Kobanê, Berçeme Cûdî, Berfîne Çiya, Berxwedan Batman, Serxwebûn Xerîb, Bawer Sîpan pîmê bombaya xo ant û canê xo dormeyê Kobanê de kerd çemberê xoverdayîşî. 12 şerwanî bîyî 12 siwareyê xoverdayîş û serkewtişê Kobanê.

-Kitabê Destanê Serzûrî yê Ferhat Şamîyî ra îstîfade ame kerdene.