Netîceya hêrişanê dewleta tirke ya îşxalkere de Rojawanê Kurdîstanî de Dêrik, Girkê Legê, Rimêlan, Çilaxa, Tirbespiyê, Qamişlo, Amûdê, Til Koçer û Til Hemîs de 2 hezar û 890 dewî bê ceyran û bê awe mendî. Kantonê Firatî de 300 dewê Eyn Îsayî û 30 dewê Kobanê zî bê ceyranî mendî. 

Dewleta îşxalkere santralê ceyranî yê Dirbêsîyê 2 reyî, santralê ceyranî yê Amûdê, santralê ceyranî yê Qamişloyî di reyî, santralê ceyranî yê Tirbesipîyê 2 reyî dayî bombayan ver. Netîceya hêrişan de 4 îstasyonê ceyranî bi temamî rijîyayî. 

Kantonê Cizîre de 450 bîranê awe ra 124 bîrî aktîf mendî. Ancî Cizîre, Dêrazor, Girkê Legê, Çil Axa, Tirbespiyê û Qamişlo de xizmetê awe bombardumanan ra vindertî.

Hemserekê Ofîsê Enerjî yê Kantonê Cizîre Ekrem Silêmanî û Hemsereka Ofîsê Enerjî yê Kantonê Firatî Ayşe Nasir derheqê hêrişanê vera çimeyanê enerjî de agahîyî dayî ajansê ma.

Ekrem Silêmanî ard ziwan ke dewleta tirke ya îşxalkere qasê 54 reyan hêrişê çimeyanê enerjî kerdo û vat: ''Rojawan de krîzê ceyran, petrol û gazî est o. Ancî depoyê mazotî ameyî xerakerdene. Meseleyê gazî, mazor, benzîn û ceyranî cidî yê. Îmkanê ma yê tamîrkerdişê çimeyanê enerjî zî ameyî xerakerdene. Heta ke destê ma ra yeno ma kenê ke meseleyan çareser bikerê la heyf ke heta nika ma nêeşkayî çareserîyêke peyda bikerê. Xora herêmê Îdareyê Xoserî binê ambargoyî de yê coka peydakerdişê hacetan zehmet o. Tewr tay mîlyarêk dolar zerarê ma yo madî est o.''

Ayşe Nasir îfade kerd ke Eyn Îsa û Kobanê de 660 dewî tarîye de mendî û vat: ''Hêrişanê vera binawanîya herême ra dima zehmetîya şarê Kantonê Firatî zêdîyaya. Bi îmkananê xo ma do bi rayîrê jeneratoran ceyranî benê şarê xo. La mumkîn nîyo ke no zî mende bibo. Çunke sotemenîye zî ha qedîyena. Şarê Rojawanî tim hetê Îdareyê Xoserî de yê. Şarê ma do xoverdayîşê xo ra fek vera nêdê. Hayîya nînan est a ke îmkanê Îdareyê Xoserî kêm ê la rixmê ney zî paştî danê îdareyê xo.''