Rojawanê Kurdîstanî de hêrişê îşxalî yê dewleta tirke yê vera Herêmanê Pawitişî yê Medya ameyî protestokerdene.

Kobanê

Kobanê de rayberîya Têgêrayîşê Ciwanan ê Şorişgêran ê Sûrîye û Yewîya Cinîyan ê Ciwanan de pê meşaleyan rayraşîyayîşêk ame kerdene. Ciwanan rayraşîyayîş de xoverdayîşê gerîlayan selam kerd û da zanayene ke ê hetê gerîlayan de yê.

Amûdê

Roniştoxanê Amûdê vera hêrişan nawnayîşêk kerd. Hemsereka Meclîsê Partîya Yewîya Demokratîke Minewere Xalid nawnayîş de qisey kerd û bêvengîya hêzanê mîyanneteweyîyan û PDKyî şermezar kerde.

Girkê Legê

Meclîsê Keyeyanê Şehîdan pê eşkerayîyêk verê hêrişan vejîya û pare kerd ke gerîlayî Kurdîstan pawenê. Eşkerayîye de venga dewleta tirke ya îşxalkere ame dayene ke wa hêrişan vindarna.

Til Hemîs

Hemwelatîyanê Til Hemîsî vera hêrişanê îşxalî nawnayîşêk kerd. Nawnayîş de pankarta bi nuşteyê 'Ma verê dewleta tirke de milê xo nêanê verî' abîye û sloganî ameyî vatene. Qiseykerdişan de ame vatene ke şarê Rojawanî seba pawitişê Kurdîstanî amade yo.

Heleb

Meclîsê Keyeyanê Şehîdan pê eşkerayîyêke hêrişê îşxalî protesto kerdî. Eşkerayîye de ame vatene ke nê hêrişî plankerde yê, tede mesajê qirkerdişî estê coka serrgêra Qirkerdişê Armenîyan de dîyayî destpêkerdene.

Şehba

Bi seyan aktîvîstanê Têgêrayîşê Ciwanan ê Şorişgêran ê Efrînî vera îşxalan çalakîya rayraşîyayîşî kerde. Çalakîye de fotografê Rayberê Şarê Kurdî Abdullah Ocalanî ameyî akerdene. Ciwanan pê sloganan paştî daye xoverdayîşê gerîlayan.