Rojawan de tebdîrê vera vîrusê Korona zêdîyenê. Bi bira qedexeyê vejîyayîşê teberî ya Îdareyê Xoserî zî nê tebdîrî ameyî zixmkerdene. Herême de hema kesêk de vîrusê Korona nêame tesbîtkerdene.

Îdareyê Xoserî verê cû sey tebdîranê Korona berê sînorî girewtbî, çalakîyê girseyî qedexe kerdbî û masaya krîzî awan kerdbi. Îdareyê Xoserî seba ke Korona vila nêba bira qedexeyê vejîyayîşê teberî îlan kerde ke 23ê adare de do dest pêbikero.

Ma şarî ra persa ke derheqê tebdîran û qedexeyê vejîyayîşê teberî de senî fikirîyeno. Hemserekê Komîteya Weşîye ya Îdareyê Xoserî ya Rojawanî Ciwan Mistefayî zî qala amadekarîyan kerde.

Esnafê bi nameyê Kamîl Loloyî pare kerd ke bazaran û suqe de sixletîye çin a û vat: ''Şar Korona ra terseno, no zî tesîrê bazaran keno.''

Hemwelatî Ekrem Mistefa vat: ''Rewşa se ra 10ê şarî hetê ekonomîkî ra hol a. Eke qedexeyê vejîyayîşê teberî bibo ma do senî debarê xo bikerê?''

Hemwelatî Azad Mihemed Miradî vat: ''Eke ti feqîrî tebdîrgirewtiş zor o. Ez neçare ya ke her roje şora û bixebita.''

Hemserekê Komunî Ebdulxanî Tahayî zî vat: ''Ganî komunî hîna aktîf bibê. Ganî komunan ser o şar êro pawitene û Îdareyo Xoser komunan, meclîsan û kantonan reyde bi koordîne bixebito.''

Qamişlo de berberî zî bi lapikan û maskeyan xebitîyenê. Îdareyê Xoserî yê Qamişloyî bire dabî ke şaristan de seferê resnayîşî bêrê vindartene. Şaristan de resnayîşî hetê taksîyan ra yeno kerdene. Ramitoxê taksîyan pê rewşe kêfweş ê û vanê ke karê înan nika holêr o.

Ramitoxanê taksîyan Mihemed Xelîlî, Bavê Mîtanî û Remezan Eshedî da zanayene ke ê goreyê tebdîranê Îdareyê Xoserî têgêrenî.

Dr. Mistefa: Ma heta nika nêweşîya Korona tesbît nêkerde

Hemserekê Komîteya Weşîye ya Îdareyê Xoserî Ciwan Mistefayî ard ziwan ke pêro welatî vera Korona tam amade nîyê û vat: ''Ganî hem hemwelatîyî hem zî Komîteya Weşîye tebdîran bigêrê. Hema ma şaristan de rastê Korona nêameyî. La eke ma vîrusê Korona tesbît bikerê ekîpê ma yê weşîye, personelî û merkezê ma yê weşîye kenê ke xo amade bikerî. Ma Doktoranê Sînornenasan reyde bi koordîbe xebitîyenê.

Ganî her çî ra verî şarê ma pakîya xo, yê keyeyê xo, dormeyê xo bikero. Goreyê qaîdeyan têbigêro. Ma her hetî ra bira qedexeyê vejîyayîşê teberî ser o munaqeşe kerd û ma hê kenê. Ma her şertî de do wayîrê şarê xo bivejîyê, hetkarîya ci bikerê. Ma do xebetanê xo rayaumûmîye reyde pare bikerê.''