Serrgêra îşxalkerdişê Efrînî ke hetê dewleta tirke û çeteyanê ci ra ame kerdene de Rojawanê Kurdîstanî de şar vejîya kuçeyan û ard ziwan ke heta azadkerdişê Efrînî ê do têkoşînî rê dewam bikerê.

Şehba de hetê Meclîsê Efrînî ra bi sloganê bi 'Ruhê xoverdayîşê Garê' ma do Efrînî azad bikero çalakîyêke ameye organîzekerdene. Çalakîya ke şarê kurd, ereb û tirkmenan tewrê ci bi de fotografê şehîdanê Xoverdayîşê Dewrî ameyî kiriştene.

Endama Koordînasyonê Kongraya Starî Hedîye Yusifî ke çalakîye de qisey kerd vist vîrî ke îşxalê dewleta tirke yê vera Efrînî 3 serrî xo dima verdayî û vat: ''La rayapêroyîya mîyanneteweyî vera nê îşxalî hema zî bêveng a. Dewleta tirke Garê û Heftanînî bikewt. Şarê ma nika Şehba de xover dano. Ma do pê xoverdayîşê pîlî Efrînî azad bikerê.''

Hemserekê Pêroyî yê Partîya Ameyoxê Sûrîye Îbrahîm Qeftanî zî vat: ''Dewleta tirke şorişê Rojawanî ke şorişê şaran o rê xayînîye kerde. Dewleta tirke û çeteyanê ci hêrişê projeyê neweyê demokratîkî kerd. Ma do pê xoverdayîşî Efrîn, Serêkanîye û Girê Sipî azad bikerê.''

Reyna Til Temîr, Kampa Waşukanî, Hesekê, Şedadê, Dirbêsiyê, Reqa û xeylêk cayanê bînan ê Rojawan de bi çalakîyan hêrişê îşxalî û tecrîdê serê Rayberê Şarê Kurdî Abdullah Ocalanî ameyî şermezarkerdene û mesajê pîlkerdişê têkoşînî ameyî dayene.