Şerwana YPJyî Dilêre bale ante tesîrê fikranê Rayberê Şarê Kurdî Abdullah Ocalanî ser û vat: ''Rayber Apoyî nasnameyê kurdan gandar kerd û sayê ey de kurdî bîyî wayîrê xeylêk destkewteyan. Coka dewleta tirke şexsê Rayber Apoyî de hêrişê kurdan kena.''

Rojînda Dilêr ard ziwan ke îqtîdarê Erdoganî keno ke pê metodanê şerê taybetî îqtîdarê xo rê dewam bikero û vat: ''Dewleta tirke ya îşxalkere pê şerê psîkolojîkî wazena xo serkewte bimojna. Coka a xeberanê zûran pare kena. Ganî şarê ma vera medyaya tirke şîyar bibo. YPJ ho dekeweno serra 9. Netîceya têkoşînê xo de ma xeylêk destkewteyî vistî destî. Têkoşîn û xoverdayîşê Rojawanî bêmabên dewam kenê.

Rojînda Dilêr xeberêka ke medyaya tirke de derheqê ci de weşanîyaye ser o qisey kerd û vat: ''Goreyê xebere ez hetê teyarayanê dewleta tirke ra ameya şehîdkerdene. Pê xeberanê winasênan dewlete şerê taybetî kena. Hetê medyaya şerê taybetî ya dewleta tirke ra xebera ke mi ser o ameya vilakerdene raşt nîya. Ez karê xo ser o ya. Garê de zî dewleta tirke heman propaganda kerd. Wa kes na xebera zûre ra semed nêdejo. Pê fikr û felsefeya Rayber Apoyî ma do heta peynî şorişê Rojawanî bipawê.''