Dewleta tirke ya îşxalkere cerganê xo reyde 1ê êlule ra nata 65 reyî pê çekanê giranan hêrişê Eyn Îsayî kerd. Nê hêrişan de 5 sivîlî ameyî qetilkerdene, 13 sivîlî birîndar bîyî û zerar resa xeylêk mal û erazîyan ser.
Dewleta tirke ya îşxalkere semedo ke Eyn Îsa zêdêr îşxal bikera cerganê xo reyde bi taybetî hêrişê ca û waranê sivîlan kena. Dewa Dibisî ya Eyn Îsayî menga peyêne de pê çekanê giranan dîyena bombayan ver. 17ê êlule de çar sivîlî ameyî kiştene û 3 sivîlî zî birîndar bîyî.
Cerganê dewleta tirke 22ê êlule de saete 04:30 de xîret kerd ke dewa Dibisê îşxal bikera. Guleyî varnayî dewe ser û netîceya hêrişî de Necib El Ewit (35) qetil kerd, Mihemmed Şerîf El Ewet (83), Zeynep Mihemmed Şerîf (30), Tirfa Miraî El Naşî û 3 kesê bînî zî birîndar kerdî. Netîceya bombardumanê vera rayîrê M4î de Mehmud Feyîz En Menfî birîndar bi.
Dewa Dibisê ya Eyn Îsayî serê rayîrê M4î de ya. Vakurê dewe de baregehê artêşa tirke ya îşxalkere esto. Hêrişê vera dewe bi giranî nê baregehî ra yenê kerdene.
Dewa Dibisê hem serê rayîrê M4î de ya, hem xeta Kobanê, Minbic û Sirînî ser de ya coka dewêka stratejîk a. Coka dewleta tirke wazena pê îşxalê Dibisê Kobanê, Minbicê û Sirînê xeta Eyn Îsa û Reqa ra biqerifna.
