Mîtan Qamişlo, Dogan Mele Gazî, Rizgar Ereb, Cano Sebrî, Nêçirvan Êzidî, Andok Cotkar, Riyad Qamişlo, Haci Qamişlo, Demhat Ekla, Baran Rizo, Têkoşer, Herekol Qamişlo, Êvan Qamişlo, Can Arap. Û xeylêk fedayîyê ke nameyê înan nêzanîyenê...Qamişlo, Dêra Zorê, Şingal, Almanya ra heta Swêdî ra xeylêk kesî tewrê Xoverdayîşê Rûmetî bîyî.

Komêka şerwanan semedo ke tewrê Xoverdayîşê Rûmetî bibê yewinanê xo û nêweşxane ra fîrar kerd. Komêka tede kurdî, erebî, enternasyonalîstî estbîyî qala macerayanê xo kerde. Endamanê na kome ra Mîtan Qamişlo û Herekol Qamişloyî ANFyî rê qala macerayanê xo kerde.

Rayberê kome Mîtan Qamişloyî vat: ''Wexto ke hêrişanê vera Serêkanîyê dest pêkerd ez perwerde de bîya. Mi waşt ez şora la embazan vat 'uca de embazî estê.' Têna rojêke ez daymîş bîya û roja bîne mi fîrar kerd, ez şîya Qamişlo. Mi uca de embazê xo dîyî. Mi embaz Cano dî. Ey zî yewina xo ya Dêrikî ra fîrar kerdbi û waştêne şorê Serêkanîyê. Dima birayê Canoyî Can û Rîyad zî ameyî ma het û sewbîna embazî tewrê ma bîyî. Embaz Demhat estbi, o zî ame. Ma keyeyê Canî de kom bîyî.

Şingalî ra di embazan semedê şerê Serêkanîyê fîrar kerdbi. Embaz Dogan estbi, Hemleya Mimbicî de birîndar bibi. Embaz Gazî estbi, çimêkê xo vînî kerdbi. Embaz Baran estbi, birîna ey giran bi la reyna zî ame. Swêdî ra bi nameyê Nêçirvan Êzidî embazêk estbi. Embaz Andok Cotkar (Konstantin Gedig) estbi ke alman bi. Botan, Rizgar, Herekolî zî yewinanê xo ra fîrar kerdbi. Xalê Canoyî Êvan zî ma reyde ame.

Koma ma wina ameye pêser, ma xo rê vatêne 'Koma Fîrarîyan.' 3 rojî ma Qamişlo de keyeyêk de mendî û amadekarîyê xo kerdî. Dima ma şîyî Hesekê û embazan rê vat ke ma fîrarî yê û wazenê şorê Serêkanîyê. O çax fîrarîyê bînî Berzo, Îmad û Omer zî tewrê ma bîyî. Hûmara ma zêdîyabî coka ma bire daye ke sey di koman şorê. Ma xo dewleta tirke ra nimitêne. Koma bîne wexto ke resaye Serêkanîyê bîye hedefê hêrişî la weş û war resaye.

Serêkanîyê binê ablûqa de bîye. Ma sey di koman tewrê cepheyî bîyî. Xeylêk teyarayê şerî û keşfî estbîyî. Dişmenî bi giranî hewayî ra hêriş kerdêne. Cerganê ke pê pereyî şer kerdêne artêşa tirke rote.

Andok personelêkê weşîye bi. Ey çeka BKCyî girewte û embaz Rizgarî tira vat wa tedbîr bigêro. Andok Alman, Rizgar zî ereb bi. Andokî pê çeka BKCyî panzerêk îmha kerd, dişmenî xo apey girewt. La teyarayan da warî ro û Andok şehîd bi. Di embazan ê cinîyan û Rizgarî waşt Andok bigêrê la teyarayan da înan ro û ê zî şehîd bîyî. Semedê şehîdanê na kome kam se vajo kêm maneno. Ê pêro fedayî û şorişgêr bîyî.''

Endamê koma fîrarîyan Herekol Qamişloyo ke ereb o vat:  ''Ez o çax semedê yew karî Qamişlo de bîya. Embaz Mîtan û şehîd Rizgarî vat ke ê do şorê Serêkanîyê. Mi fermandarîya yewine kerdêne, mi waşt ez zî şora Serêkanîyê la embazan qebul nêkerd. Mi zî fîrar kerd. Ez, şehîd Rizgar û embaz Botan ma heman dewe ra bîyî, ma pîya tewrê xeylêk hemleya bîyî. Rizgarî nêwaştêne ez şora Serêkanîyê, çunku birayê ci verê çimanê ye de şehîd bibi...Verî Mîtan û Rizgar şîyî. Dima ez daymîş nêbîya. Ez, şehîd Kendal û di embazê bînî ma kewtî rayîr.

Rayîr de nêzdîyê noqtaya Heyva Sore ya Kurdan de ma ser o bombayî varayî. La ma rayîrê xo rê dewam kerd. Wexto ke ma resayî Serêkanîyê mi waşt ez şora cayê Rizgarî. La o cepheyê verênî de bi û embaz Mîtanî destûr nêda ke ma şorê cepheyê verênî. Mipê cîhazî û telefonî çend reyî Rizgar de qisey kerd. Dima mi koma Rizgarî ra embazêk dî. Ey zanayêne ke Rizgar şehîd bîyo la mi rê çîyêk nêvat. Vat Rizgar birîndar bîyo û xo ver dano. Ez pê hîsê qesasî kewta mîyanê hêrişî. Nê hêrişî de ez birîndar bîya. Ma şîyî nêweşxaneyî.

Wexto ke ma şîyî Til Temir mi eşnawit ke Rizgar şehîd bîyo. Rizgar rêçê şehîdan ser o şi û resa armancê xo. A kome de tewr zaf embazîye mi rê tesîr kerd. Kurd, suryanî, erebî...Bê cîyatîye ma pîya şer kerd. Nika Til Temir de xoverdayîşê ma dewam keno. Se beno wa biba ma nêverdê dewleta tirke erdê ma îşxal bikera. Ma do herêmanê îşxalkerdeyan azad bikerê.''