Hemserekê Daîreyê Tekîlîyanê Teberî yê Vakur-Rohilatê Sûrîye Abdullkerîm Omerî derheqê xebatanê dîplomatîkan ê serra 2021î de ANFyî rê qisey kerd.

Abdullkerîm Omerî vat: ''Pêvînayîşanê ma yê emsserî de rojdemê ma naskerdişê îdareyê Xoserî bi. Pîya bi naye ma hêriş û tehdîtanê dewleta tirke ser o vindertî. Seba ke Berê Sînorî yê Til Koçerî û berê bînî bi vetoyê Rûsya û Çîn ameyî qefilnayene nê tesîrê 5 mîlyon hemwelatîyan kerd. Bitaybetî ke herême ke bi serran binê îşxalê DAÎŞî de mendî de seba ke hetkarîya merdimîye nêbîye problemê bêkarîye û ekonîmîkî vejîyayî. DAÎŞ keno ke nê sey şansêk bişuxulno û xo newe ra rêxistine bikero.

Pêvînayîşê Komîsyonê Qanûnê Bingeyênî yê Cenevre ke ma tede ca nêgenê nêeşkenê problemenê Sûrîye çareser bikerê. Ma no tim biisrar ard ziwan. Ma rewşa DAÎŞijan û medimanê înan ê ke zîndan de yê fînaye rojdem. Bitaybetî eke Kampa Hole wîna dewam bikero do ameyox de krîzêko merdimî vejîyo werte ke tesîrê ma û pêro rayapêroyîya mîyanneteweyî bikero. Ma derheqê nînan de muxataban de qisey kerd û cehd kerd ke çareser bikerê.

Seba ke berê ke  teberî rê abenê yenê qefilnayene ambargo beno. Seba ke Başûrê Kurdîstanî Berê Sînorî yê Sêmalka-Pêşxaburî qefilnayî ma rê zaf asntengîye vetî. Jan û qefilnayîşê beran ra ma tengayîye ante. Xeylêk rey semedê pêvînayîşan ma nêeşkeayî vejîye teber. Seba ke ma weletanê ereban de zî pêvînayîşan mekerê astenîye sûnîyî estê. Ma ser o propagandayî sîyayî yenê kerdene. Bi tesrîê dewleta tirke heta nika pêvînayîşê ke yenê pawitene nêameyî kerdene.

Katalonya Îdareyo Xoser nas kerd, no çîyêko muhîm bi û pîya bi naye xeylêk welatanê bînan zî sey fîîlî dest pê naskerdişî kerd. Ma nika teberê welatî de bi hewayêkê fermî pêvînayîşan kenê. Berê heme wezîranê karanê teberî yê welatanê Ewropa ma rê akerde yê. Heta ke ma sey Sûrîye problemanê xo çareser nêkero, Îdareyo Xoser tewrê pêvînayîşanê qanûnê bingeyênî mebo naskerdişê stûtuyî mumkun nîyo.

Ma temsîlkarîya xo ya verêne bajarê Silêmanî yê Başûrê Kurdîstanî de akerd. Paytextê  Rûsya Moskova de temsîkarîya ma esta. Semedê çar welatanê Îskandînavya (Norveç, Danîmarka, Swêd, Fînlanda) Stockholm de yew temsîlkarîya ma esta. Semedê hîrê welatanê Ewropa (Hollanda, Bruksel Luksemburg) Bruksel de yew temsîlkarîya ma esta. Paytextê Fransa Paris û paytextê Almanya Berlin de temsîlkarîye ma estê. Ma emser Swîsre de temsîlkarîye ke akerde. Demê verê ma de ma do cayanê ke muhîm vînenê de temsîlkarîyan abikerê. Planê ma esto ke ma paytextê Îngîlîstanî London de temsîlkarîye abikere.

Ma wezanê ke problemanê Sûrîye pîya bi îdareyê Şamî çareser bikerê. Heyetê Cenevre û Astana ganî newe ra bêrê destgirewene. Amerîka û Rûsya vera hêrişanê dewleta tirke yê bêven gê. Eşkerayo ke ê nê hêrişan tesdîq kenê. Herêmê ke bi serran binê kontrolê DAÎŞî de mendî de hema îdeolojîya DAÎŞî esta û beno ke xo newe ra ganî bikero. Bêvengîya mîyanneteweyî, qefilnayîşê Berê Sinorî yê Til Koçerî, ambargoyê herême, hêrişê dewleta tirke, birnayîşê awa Firatî, cehdkerdişê afernayîşê krîzê ekonomkî û bêîstîkrarkerdişê herême, rewşa bi hezaran DAÎŞjan ke kampe û zîndanan de yê nê pêro paştî danê DAÎŞî.

Derheqê herêmanê ke binê îşxalî de yê dosyayê taybetî yenê amedekerdene û pêvînayîşanê heyetan de yenê teslîmkerdene. Sereyê pêvînayîşanê ma yê dîplomasî de qewimîyayîşê cayanê îşxalkerdeyan ya ca genê. Derheqê koçberan de xebatê ma estê. Rixmê ambargo û janî xebatê Îdareyê Xoserî û MSDyî nêvindertî. Emser ma do dîplomasîya umûmîye û dîyalogê bi welatanê Rojhelatê Mîyanênî zafêr esas bigêrê. Ma bi hêvîya pîlêre dekewenê serra newîye.''