Aktîvîte Doblîng Volkshochschule de ameye viraştene û aktîvîte seba kesê ke têkoşînê şorişî de şehîd kewtî, bi deqayêk rêzgirewtiş ame dest pêkerdene.

Aktîvîte de Hemserekê Meclîsê Sûrîyeya Demokratîke Rîvar Dîyar Derar, Temsîlkarê PYDyî yê Vîyana Sabrî Hemo û sîyasetmedarê Partîya Sosyal Demokratanê Avusturya (SPO) Anton Handlî qisey kerdî.

Derarî va ‘wexto ke şerê Sûrîye dest pêkerd, grûbê bînî hetanê cîya-cîyayan reyde hereket kerdî’ û wina domna: “Labelê kurdî xo rêxistine kerdî û modelêkê cuye awan kerdî. Kurdî tena seba xo nê, seba heme şaran nê modelî awan kerdî. Sîstemê kurdan hetê şaranê bînan ra ame qebul kerdene û şarî wayîrê sîstemî vejîyayî.”

Derarî qiseykerdişê xo de qala dagîrkerîya dewleta tirkî ya Efrînî zî kerd û wina va: “Kesê ke Efrîn dagîr kerdî, hesab nêkerdî ke şarê Efrînî teslîmê înan nêbeno. Efrîn dagîr kerdî, labelê şerwanî her roje danî înan ro. Ma wazenî komelêko azade awan bikerî û ma do Efrîn azade bikerî. Ma do rayîrê Rayberê Şarê Kurdî Abdullah Ocalanî de şêrî.”

Tayê kurdî çeteyan reyde hereket kerdî

Sabrî Hemoyî zî bi yadkerdişê sîyasetmedarê ke hetê rejîmê Baasî ra ameybî qetil kerdene dest bi qiseykerdişê xo kerd û wina va: “PYD partîya ke rayîrê şehîdanê xo de şona ya. Wexto ke şerê Sûrîye dest pêkerd, tayê kesê ke îdîa kerdênê ke ser nameyê kurdan sîyaset kenî, çeteyan reyde hereket kerdênê. PYDyî bi hêzê cewherî yê kurdan hereket kerd û rayberîya Şorişê Rojawanî kerd. Ez veng dana kurdanê Ewropa ke wa hîna zaf wayîrê Şorişê Rojawanî bivejyî.”

Sîyasetmedarê SPOye Anton Handlî zî da zanayene ke o bi zerrî ra destek dano têkoşînê azadî û demokrasî yê kurdan û va ‘seba ke vera çeteyê ke bîybî belayê sere şaranê herême de têkoşîn dayî, ma minetdarê kurdan î’.

Aktîvîte de grûbê muzîkî yê bi nameyê Koma Mêdya, Koma Dem, Koma Arîne ca girewtî. Govende ameye girewtene û derheqê têkoşînî de kaya tîyatroyî ya kilme ame kay kerdene.