Qezaya Sûrî ya Amedî de hetê Têgêrayîşê Cinîyan ê Azadan (TJA) ra Şayîya Newroze ya bi erbenayan û bi meşaleyan ameye kerdene. Hemşaredarê qeza, wekîlê DEM Partî û xeylê temsîlkarê partîyanê sîyasîyan û rêxistinanê komelê sîvîlî tewrê ci bîyî.

Verî bi def û zûrna û erbaneyan govende ameye girewtene û dima ra meşaleyî ameyî tavistene û deyîrî ameyî  vatene. Cinîyî dima bi meşaleyan vejîyayî sûran ser û sloganê “Newroz pîroz bo”, “Bê Serok jiyan nabe”, “PKK şar o, şar tîya de yo” û “Bijî Serok Apo” vatî. Sûrî bi tîlîlîyanê cinîyan û slogananê “Jin, jiyan, azadî” zimayî. Cinîyan ke sûran ser deyîrî û sloganî vatî, dima ra sûran ra ameyî war û govende girewte.

Aktîvîsta TJA Hacar Ozdemîr Ozdemîrî vat: ''Ma wayîrê mesajê Birêz Ocalanî bivejê. Ma wayîrê haştîye bivejê. Rayîrê ma zehmet o la ma ameyî peynîya rayîrî.''

Wekîla DEM Partî Newroze Uysal zî nê vatî: ''Newroze semedê şarê kurdî xoverdayîş, azadîye û têkoşîn o. Meşaleyê ke ma tîya tavistî do biresê Rojawanî. Biresê Pexşane Ezîzî. Biresê cinîyan ke Sûran de bîyî Newroze. Newroze sembolê xoverdayîşî ya. Ma do wayîrê mesajê Birêz Ocalanî bivejê û na Newroze bikerê Newroza Azadîye.''

Badê qiseykerdişan şayîye bi govnede adekare