Amed de cinîyê ke xebatanê ziwanê kurdkî û rêxistinê komelê sîvîlî de ca genê Meclîsê Cinîyan ê Ziwanê Kurdkî na ro.

Eşkerayîya çapemenîye Şubeyê Egîtîm Senî de ameye kerdene. Warê eşkerayîye de pankartê "Ma cinî xo rêxistine kenê ziwanê xo azad kenê" û "Sedsala jinê wê bibe şoreşa zimanê Kurdî"  ameyî daliqnayene.

Cinîyî ke bi kincanê xo yê herêmî tewrê eşkerayîye bîyî dovîzê "Kurd, Kurdkî, Kurdistan", "Cinî û ciwan, kultur û ziwan", "Kurdkî nasname me ye", "Her car Kurdkî, her dem Kurdkî" kiriştî. Eşkerayîye bi kirmanckî û kurmanckî ameye wendene.

Eşkerayîye de bale ameye antene serê Vengdayîşê Haştîye û Komelê Demokratîkî yê Rayber Apoyî yê 27ê sibate ser. Cinîyan vat ê do semedê haştîye û demokrasîyî wezîfeyanê xo bîyarî ca û veng da îqtîdarî ke wa gamanê ke tira yenê waştene bierzo.

Eşkerayîye de ame vatene ke cinîyî seba ke rêxistinîya xo xurtêr bikerê sey cinîyan ke ziwanê kurdkî ra hes kenê, ronayîşê Meclîsê Cinîyan ê Ziwanê Kurdkî îlan kenê.

Meclîsê Cinîyan ê Ziwanê Kurdkî vat ê do vera polîtîkayanê zextî têkoşîn bikerê û hedefê xo wina rêz kerdî:

Pawitişê heqê perwerdeyê ziwanê dayîke: Verê mektebî ra heta unîversîte seba ke kurkdî bibo ziwanê perwerdeyî xebatî do bêrê kerdene.

Teşwîqkerdişê ziwanî: Edebîyatê kurdkî û waranê sey huner, medya û akedemikî de hûmara cinîyan do bêro zafêrkerdene.

Her warî de xuşulnayîşê kurdkî: Dezgehanê fermî, medya û cuyeya komelkî de seba ke kurdkî azad bêro şuxulnayene do xebatî bêrê kerdene.

Zêdekerdişê zanayîşê ziwanî: Seba ke zereyê keyeyî û mîyanê komelî de kurdkî dahîna zaf bêro qiseykerdene do falîyetê zanayîşdayîş bêrê kerdene.

Xurtkerdişê hemkarîya mîyanneteweyîyî: Welatanê cîya cîyayan ra têgêrayîşê cinîyan û  têkoşînê semedê ziwanê şaran reyde hemkarîye do bêro ronayene.

Meclîsê Cinîyan ê Ziwanê Kurdkî peynî de wina veng da: ''Gerek her cinî semedê pawitiş û ciwîyayîşê ziwan, nasname û kulturê xo têkoşîn bikero. Her vateyê kurdkî xoberdayîşê ma yo. Eke kurdkî biciwîyo şarê ma zî ciwîyeno, eke kurdkî bibo azad cinî zî benî azad.''

Eşkerayîya çapemenîye bi slogananê  "Jin, jiyan, azadî", "Zimanê me hebûna me ye" û "Zarav, ziman, azadî" qedîyaye.