Têgêrayîşê Komelê Demokratîkî (TEV-DEM) bi eşkerayîyêke serrgêra 17. de şehîdê 'Serewedaritişê Qamişloyî' yad kerdî.

Eşkerayîye wina ya:

''Bi wesîleya serrgêra 17. ya Serewedaritişê Qamişloyî ma verê vîrameyîşê şehîdanê Serewedaritişî û şehîdanê Şorişê Rojawanî de rîyê xo anê war. Hîkayeya serewedaritişî 2004 de Qamişlo de vera rejîmê Baasî dest pêkerde û pêro Sûrîye û Rojawanî rê vila bi. Rejîmê Baasî nê mîyanî de ma rê komplo kerd û xîret kerd ke fîtneyan dekerê mabênê kurd û ereban. Labelê hîkayeya destpêke cade vera plananê komplogeran vurîya serewedaritişê şarî. Ganî rejîmê Sûrîye bi rolêkê aktîfî têbigêrayêne û qanûnê bingeyî de tay vurnayîşî bikerdêne. La herinda nînan de rejîm kurdan ra hesab perseno. Şorişî ra 10 serrî derbaz bîyî, hîşmendîya rejîmê Baasî hema zî nêvurîyaye, hemkarîya bi dewleta tirke ra fek vera nêda û çareserîyî pêşkêş nêkerdî. Coka krîzî hema zî dewam keno, Peymana Adana dewam kena û rejîm xeniqîyeno.

Îdareyo Xoser seba ke Sûrîye biaçarna nasnameyê ci xîret keno, têkoşîn keno. Na çareserîya pêro meseleyan a Sûrîye ya. Rejîmê Baasî goreyê biranê Peymana Adana têgêra, bêsebeb şarê ma destbend kerd, waştişê îşxalkeran ser o mehkemeyî ronayî, şarê ma da guleyan ver.  La şarê ma rixmê hende kerdişan zî çalakîyê demokratîkî ardî ca û seba haştîye veng da.

Serewedaritişê 12ê Adara 2004î tewirê Baasî yo faşîst ê vera kurdan û şaranê bînan ê Sûrîye eşkera kerd. Peymana Adana reyde zî dîya ke dewleta tirke senî tesîrê Baasî keno û o teslîm girewto. Heta nika rejîmî pê çimêkê kîndarî ewnîyayêne kurdan rê çunke kurdan seba pawitişê Sûrîye bi hezaran şehîdî dayî. Na raştîye wextê îşxalê Efrîn, Serêkanîyê û Girê Sipî de dîyaye.

Sey TEV-DEMî ma pê bawer ê ke rewşa Sûrîye bena xirabêr û alozîye bena pîlêr. Meseleya Sûrîye zereyî ya û çareserîya ci zî zere de ya.

Ma soz danê şehîdanê Şoreşê 12ê Adare û pêro şehîdanê azadîuye ke ma do vera îşxalanê dewleta tirke asta têkoşîn û xoverdayîşî berz bikerê. Ganî rejîmê Sûrîye pê cidîyetî nêzdîyê mesele bibo û îradeyê şaran ê azadan ê Sûrîye qebul bikero.''