Sûrîye ra ver bi Lîbya di kanalan ra  sewqîyatê 'leşkeran ê bipereyan' yeno kerdene. Organîzatorê kanala verêne dewleta tirke ya û yê diyîne zî Rûsya ya. Dewleta tirke heta nika herêman ra ke îşxal kerdî, 14 hezar cergî seba Hukmatê Mutabaqata Neteweyîye ya rayberîya Birayan ê Misilmanan Lîbya rê şawitî. Yeno vatene ke Rûsya zî Sûrîye de tay kesî kom kerdî ke seba paştdayîşê Artêşa Mîllî ya Lîbya bierşawa Lîbya.

Goreyê raporê Keyeyê Çimdarîye yê Sûrîye (SOHR) Tirkîya heta nika tewr tay 13 hezar sûrîyeyîjî sey leşker erşawitî Lîbya û înan ra 300 tenî 'doman' ê. Rapor de ame vatene ke kerdişê dewleta tirke 'sûcê şerî' yo.

Serekê Forumê Kurd-Almanî Yunis Behranî derheqê babete de ANFyî reyde qisey kerd û îfade kerd ke cergê ke Lîbya ra erşawîyenê herêmanê îşxalbîyayeyan ra arê dîyenê û pê teyarayan Dîlokî ra erşawîyenê Lîbya.

Behramî vat: ''Tirkîya seba her leşkerî mengane 2 hezar dolar dana û hezar û 700 dolar zî dana keyeyanê înan. Dekontê nê pereyan Yewîya Ewropa rê sey 'hetkarîya ke dîyaye multecîyanê Sûrîye' yenê mojnayene. La raştî wina nîya. ''

Rojnameger Delîl Zîlanî zî ard ziwan ke dewleta tirke pê awankerdişê korîdorê transferê cîhadijan ê xeta Lîbya-Sûrîye xeylêk cergî erşawitî Lîbya. Zîlanî da zanayene ke seba ke dewleta tirke pereyanê tay cergan nêda mabênê Tirkîya û cergan de nakokîyî virazîyenê.

Ferhad Şamîyo ke komanê çekdaran ê Sûrîye nêzdî ra teqîb keno, pare kerd ke dewleta tirke tewr tay 13 hezar cergî erşawitî Lîbya. 

Şamîyî vat: ''Goreyê zanayîşanê ke ma vistî destî, dewleta tirke plan kena ke nê cergan  seba ker vera PKKyî bixebitna berê Başûrê Kurdîstanî. Nê kesî nika Tirkîya de perwerde vînenê. Dewleta tirke plan kena ke nînan bera Heftanîn.''

Rojnamger Zîlanî zî vat: ''Rûsya zî plan kena ke cerganê xo yê 'bipereyan' seba ke QSD qels bikera bixebitna.''