Zîndanê Sinaa yê Hesekê de xîretê remayîşê cerganê DAÎŞî netîceya fedayîtîya şerwanan de verê qirkerdişanê pîlan girewt.

Xoverdayîşê Hesekê çend rojî xo pey de verdayî û dejê şehîdanê Hesekê hema teze yo. Şarê Rojawanî nika şehîdanê Hemleya Gurzê Şaran defin keno. Her roje qîrayîşêko bîn ver bi hasmênî berz beno.

Hesekê de reyna merasîmê definkerdişî estbi. Cenazayê di birayanê ereban verê şarî ra vîyartî. Nameyê nê şehîdan Heyder (Ehmed Eltebxan) û Hamza (Mihemed Eltebxan) bi. Heyder babîyê di domanan bi û 1994 de dadîya xo ra bibi. Hamza 1992 de dadîya xo ra bibi. Înan çend serrrî verî mîyanê QSDyî de cayê xo girewt. Wird birayî zî famdar bîyî, ê pîya bibîy pîl, pîya şîbî dibistane. ê emrê xo de qetî cîya nêbîyî.

Înan Zîndanê Sinaa de zî pîya şer kerd. Nê şerwanan pêro dinya rê mojna ke biratîyêka waştikêne senî bena û pêro şarê herême pawitî. Ma reyna fam kerd ke merdimî pê torra gonîye nê pê torra ganî benê way û bira. Nê wird birayê ke pîya ciwîyabî, pîya şehîd bîyî.

Kekê înan merasîmê cenazayan de vatbi ke ê şarî pawitî. Kekê înan vatbi: ''Ez do şuware mevaja. Înan seba ke bibê temînatê cuya ma soz dabî û sozê xo ard ca. Înan rê çepikan pirodê, fatîha biwanê.''

A şewe xeberan ê mojnayî la hayîya çewî pê hîkayeya înan çinbîye. A şewe xeberan de Barzanî û Erdogan zî têkişt bîyî. Nêçirvan Barzanî şibi verê linganê kiştoxê kurdan.

Ma qala bêbextîye, nefretî û teslîmîyetî zaf kenê la qala çêrîye, heskerdiş û xoverdayîşî tay kenê. Ma qala merdimanê ke xo roto û merdeyanê ke nefes gênê zaf kenê la ma qala şehîdanê ke bi hezaran cuyî pawitî, tay kenê.