Selahîyetdaranê QSDyî û Koalîsyonê Mîyanneteweyîyî qedîyayîşê safhaya diyîne ya operasyonê erdê Dêra Zorê û Hesekê ser o kombîyayîşêkê çapemenîye yo hempar kerd.

Eşkerayîya çapmenîye baregehê leşkerî yê Rimêlanî de ameye kerdene. Vervatoxa Meclîsê Leşkerî yê Dêra Zorê Lîlwa Abdullah, vervatoxê Hêzanê Sûrîyeya Demokratîke (QSD) Kîno Gabriel, nameyê Koalîsonê Mîyanneteweyîyî ser mîralay Myles B. Cagginsî û bi desan dezgehê çapemenîye yê herême û dinya eşkerayîye de amade bîyî. 

Kongre de Lîlwa Abdullah rojnamgeran rê vat 'xêr ameyê' û wina dewam kerd: ''Verî ke ma eşkerayîye bidê ma do plaketêk dîyarîya fermandarîya cinîyan ê hêzanê Koalîsyonê Mîyanneteweyîyî bikerê. Hamleya Çinkerdişê Terorî yê vera cerganê DAÎŞî netîceyê pozîtîfî xo reyde ardî.''
Dima zî vervatoxê QSDyî Kîno Gabrîelî qisey kerd û îfade kerd ke xebata bikoordîn û hempare ya mabênê QSD û Koalîsyonê Mîyanneteweyîyî hetê destekê leşkerî, lojîstîkî ra do dewam bikera.

Kîno Gabrîelî vat: ''Hêzê Koalîsyonî xizmetê ekonomîkî û umûmîye danê meclîsanê herêmîyan, bi taybetî herêmanê ke newe ameyî xelisnayene. Vera herêmanê Rojawanî xeylêk hetan ra hêrişî yenê kerdene. Coka ma koalîsyon reyde seba ke DAÎŞ çin bikerê xebitîyenê. ''
Gabrîelî da zanayene ke dewleta tirke peymana ke 17ê teşrîna verêne ya 2019î de Rûsya û DYA reyde amebî îmzakerdene, binpay kena û goreyê vengdayîşo ke wextê pandemîye de  Neteweyanê Yewbîyayeyan kerd, tênêgêrena. Gabrîelî venga komelê mîyanneteweyîyî da ke wa rolê xco bîyaro ca.

Myles Caginsî zî vat: ''Mabênê Hêzanê Sûrîyeya Demokratîke û Hêzanê Koalîsyonê Mîyanneteweyîyî de şerê vera DAÎŞî de xebetêka hempare esta. Na hamleyan de ma serkewtişê pîlî vistî destî la hema zî tehlukeyê DAÎŞî esto. Ma do Hêzanê Sûrîyeya Demokratîke rê hetkarî bikerê û xebata hempare dewam bikerê. Nê hêzî vera DAÎŞî wayîrê tecrûbeyan ê. Koalîsyono Mîyanneteweyî perê QSDyî de yo.''