Zîndananê Tîpê F, S, û Yyî de tepişteyî raştê îşkence, tecrîd û binpaykerdişê heqan yenê. Tepişteyê Zîndanê Tîpê Syî yê Manavgatî Şîmal Denîzî bi mektubêke qala teda kerde.

Denîzo ke avûkatanê Buroyê Huqûqî yê Asrinî rê mektube şawita tede da zanayene ke Tîpê Syî de hucreyanê 3 kesan de serê beranê banyo û tuwaletan de kamera est a û eke ber yewbineyk zî akerde bimano pêro zere aseno.

Denîzî mektube de vat: ''Ma derheqê kamerayan de muracatê Wezîrîya Edaletî û Mehkemeya Qanûnê Bingeyî kerd. Wezîrîya Edaletî û mehkeme cewab nêda. Nika ma do muracataê TÎHEKî bikerê.''

Denîzî dîyar kerd ke waştişanê înan rê zî cewab nêdîyeno û vat: ''Ma qeleme zî biwazê nêdîyena û îdare vano ke ê do seba atolye qeleme bişuxilnê. Nê atolyeyî zî seba xebitnayîşê merdiman ronîyayê.''

Denîzî ard ziwan ke ê sey 'mehkumanê tehlukeyînan' yenê dîyene coka malzemeyê pakî zî nêdîyeno înan û vat ke malzemeyê pakîye wextê pakîye de zî teberê berî de yenê verdayene.

Denîzî îfade kerd ke wextê pêvînayîşî de nêeşkenê hetê keyeyanê xo de ronişê, kotaya kitaban nînan rê yena ferzkerdene û îtîrazê înan bêcewab verdîyenê.

Denîzî vat: ''Xûlasa ma dekenê statuyê 'mehkumanê tehlukeyînan' û dest nanê heqanê ma ser. Labelê ma tepişteyê sîyasî yê û nê pênaseyo ke hêrişê rûmetê ma keno, qebul nêkenê.''