Îdîanameyê 'Çeteya Yenîdoganî' de eşkera bi ke Firat Sariyo ke sey serekê çete hetê dozgerîye ra amebi mojnayene, serekê çete nîyo, endamê ci yo.La dozgerîye rixmê qeydanê vengan zî herinda Muran Mantuşî de Sari sey serekê çete mojnayo. Dozgerîye bi beyananê îfadeyê Sariyî xîret keno ke mabênê çete  û PKKyî de têkilîyêke virazo.

La gerrenameyê derheqê 'Yenîdogan Çetesi' de eşkera bi ke lîderê çete pawitoxê Bahçelîyî yo verên Murat Mantuş o. Mantuş polîsêko verên o zî. 

Mantuşî mabênê serranê 1997-2003yî de Serekê partîya faşîste MHPyî Devlet Bahçelîyî rê pawitoxîye kerde. Ancî nameyê ey mîyanê endamanê 'Turk Întîkan Tugaylari' (Tugayanê Qesasî yê Tirkan), Teşkîlatê Yewîya Qesasî ya Tirkan (TIBT) û Yewîya Akinciyanê Tirkan (TAB)de derbaz beno. Mantuş dima ke teqawut bi Nêweşxaneyê TRGyî de dest pê karî kerd. 

Îdîaname de bi zelalî eşkera beno ke Firat Sari binê fermanê Mantuşî de yo û Mantuşî qestî ra derguşî kiştê, sûcê sextekarîye kerdê.

Îdîaname de wina ame îdîakerdene: ''Bi fermanê Mantuşî xebatkaranê nêweşxaneyî agahîyê serê nêweşan xelet girewtî, seba ke SGKyî ra pereyê zêdeyî bigêrîyê agahîyê dergûşan ê şaşan arê dîyayê û Enes Kaan Bolukbaşî pere dayo Mantuşî.''

Ancî qeydanê vengî de vejîyayo werte ke Sariyî derheqê serebûtan de waşt ke doktorê bi nameyê Dursun Eryilmazî hişyar bikero.

Firat Sariyî qiseykerdişêkê bînî de vato ke Mantuşî pere dayo 'êyê corî' û ney ra aciz bîyo.