Endamê Fermandarîya Pêroyî ya QSDyî Lokman Xelîlî bi wesîleya azadkerdişê Reqa ANFyî rê qisey kerd.

Qiseykerdişê Lokman Xelîlî ra tay noqtayê girîngî wina yê:

''DAÎŞî Reqa de vera şarî wehşet kerdêne. DAÎŞ 10 serrî verî pêro merdiman rê tehluke bibi. Îmkan û çekê DAÎŞî zêde bîyî. Reqa paytextê DAÎŞî bibî. Şarê ma û şerwananê ma bi ked, bedel û têkoşînêkê pîlî DAÎŞ şaristanî ra vet. 

DAÎŞî xora derba verêne Kobanê de werde. Kobanê bîye destpêkê prosesê binkewtişê DAÎŞî. Çewî nêpawitêne ke Kobanê de xoverdayîşêko hendê pîl do bêro kerdene. Serkewtişê Kobanê xêrê çekan û madîyatî ra nêqewimîya; bi ruhê fedayî û yewîye qewimîya. Serkewtişê xoverdayîşê Kobanê ra dima ame dîyene ke ma eşkenê DAÎŞî bin bivisnê. Bi hezaran ciwanî tewrê YPG û YPJyî bîyî. Qezayan ra azadkerdişê Reqa dîya destpêkerdene.

7 serrî verî wextê DAÎŞî de çew nêeşkayêne sey merdiman Reqa de biwiîyo. Reqa herêmêka stratejîke bîye. Hem guzergahê zaf şaristanan hem zî wayîrê îmkananê madîyan bîye. DAÎŞî Reqa bi planê dergûdilayî qestî ra Reqa xo rê sey paytextê xo weçînabi û dima ke Reqa destê ci ra şi prosesê rijîyayîşê DAÎŞî zî dest pêkerd. 

Hemleya azadkerdişê Reqa birêka serkewte bîya. Hetê bînî ra mîyanê DAÎŞî de zaf neteweyan ra cergî est bîyê. Tay dewletan zî paştî dayêne DAÎŞî. DAÎŞî çekê xo cayê ci de şuxilnayêne

DAÎŞî dima ke Reqa û Bahoz de bin kewt sey hucreyan xo rêxistin kerd. Peyê DAÎŞî de yew îdeolojî est a. Her çiqas artêşa ci rijîyaye zî îdeolojîya ci dewam kena. DAÎŞ hema zî tehdîtêko pîl o. Hêzê ma vera hucreyanê DAÎŞî bi aktîfî têgêrenê. Şarê ma zî paştî dano hêzanê ma yê asayîşî.

La ganî bizanîyo ke herêma ma teyna hedefê DAÎŞî ney hedefê dewleta tirke û hêzanê bînan a zî. Paştdayîşê bi DAÎŞî hetê tay welatan ra hema zî yeno kerdene. Dewleta tirke paştgîra DAÎŞî ya tewr pîl a. Dewleta tirke kerdêne ke plananê xo yê îşxalî bi destê DAÎŞî bîyara ca. Dewleta tirke hema zî seba herimnayîşê aramîya herême cerganê sey ê DAÎŞî şuxilnena. 

DAÎŞî peyê xo de texrîbatêko pîl verda. Sey QSDyî ma kenê ke nê texrîbatî weş bikerê. Ma kerd ke Reqa bi lezî dejanê ci ra weş bikerê. Ewro Şaredarîya Reqa mîyanê şaristanan de şaredarîyêka tewr xurt a.''