Swîsre de Zurich de 60 rêxistinî do pîya 1ê Gulane Roşanê Karkeran fîraz bikerê. Komîteya Amadekarîye Rayber Apo bi mektubêke dawetê 1ê Gulane kerdibi.  Komîteya Amadekarîye keyepelê xo yê înternetî de kitabanê Rayber Apoyî ‘Manîfestoyê Modernîteya Demokratîke’ û ‘Pawitişê Şarêkî’ ra pasafî weşanayî.

Komîteya Amadekarîye ra Mahîr Anurî derheqê babete de ajansê ma rê qisey kerd.

Anurî îfade kerd ke sey komîte ê wazenê ke fikranê Rayber Apoyî biresnê dinya û vat: ‘’Wextêkê winayênî de ke dinya de şer û kaosî est ê verê roşnîya fikranê Birêz Ocalanî de ganî ma bi xurtî game bierzê. Birêz Ocalan sembolê xoverdayîşê vera zulmî yo. Ey bi fikrê xo yê konfederalîzmê demokratîkî bingeyê têkoşînê hemparî awan kerd. Şorişê Rojawanî sey îsbatê paradîgmaya Birêz Ocalanî û têkoşînê azadîye yê kurdan verê ma de yo.’’

Mahîr Anurî ard ziwan ke çalakîyê emserenînî do bi şîarê ‘Pîya, vera şer û faşîzmî’ bêrê kerdene û vat: ‘’Mîyanê şer û faşîzmî de ma  qerardar ê ke bibê vengê têkoşînê azadîye yê Ocalanî. Fikrê ey vera zaliman çimeyê cesaret û hêvîye yê. Birêz Ocalan hetê fikranê xo ra tepişte nîyo azad o. Tecrîdo ke dewleta tirke vera ey kena vera pêro merdimatîye hêrişkerdiş o. Erkê ma yo ke ma nê tecrîdî bişiknê û fikranê Ocalanî bipawê.’’