Amed de emtê şuxilnayîşê madeyanê narkotîkan bîyo 12 serrî. Goreyê doneyanê 2023yî yê Baroyê Amedî şaristan de sûcê bazirganîya narkotîkî ra 2 hezar û 173 kesî ameyê muhakemekerdene.

‘Platformê Têkoşînê Vera Narkotîkî’ yê Amedî newe ronîya û vera narkotîkî dest pê karî keno. Endamanê platformî ajansê ma rê qisey kerd.

Sendîkaya Kedkaranê Weşîye û endamê platformî Recep Oruçî vat: ‘’Şuxilnayîşê narkotîkî mîyanê komelî de beno sebebê dej û birînan. Seba çareserkerdişê na mesele ma no platform na ro. Platformê ma do komelî awan bikero. Meseleya narkotîkî tena yê ciwanan nîya meseleya ma ya pêroyînan a. Ma do taxan de dest bi karî bikerê û her warê komelî de bixebitê. Ma do meydanan de bibê. Ma bi bawer ê ke nê prosesî ser bivisnê.’’

Zeynepe Kaya vat: ‘’Na rewşe polîtîkayanê şerê taybetî ra qewimîyena. Şuxilnayîşê na made mîyanê komelî de beno sebebê meseleyan. Ma do her ca de serkêşîya nê têkoşînî bikerê. Wextê qeyûman ra nata şuxilnayîşê madeyanê narkotîk, fuhuş û çetebîyayîşî zêdîyayî. Ma do komelî rêxistin bikerê.’’

Ciwane Buşra Koruk vat: ‘’Şuxilnayîşê nê madeyan eşkeno bêro çinkerdene. Ganî ma sey ciwanan bixebitê. Ganî ma wayîrê ciwanan vejîyê. Her çî ra ver ganî ma sey komelî destek bidê yewbînan.’’

Lutfîye Çanakçik vat: ‘’Ma wazenê komelî nê jehrî ra bixelisnê. Ganî karê hewceyî bêrê kerdene. Na rewşe çêrîye dana ma. Sey dadîyan ma vejîyenê waran. Ma wazenê nê jehrî her ca ra vejê. Ma neslêkê pakî û komelêkê pakî wazenê.’’