Wekîlê DEM Partî yê Amedî Serhat Eren beşdarê Konferansê Tewirê Hemparî yê Kurdan ê Rojawanî bibi. Erenî sey endamêkê Heyetê DEM Partî Başûrê Kurdîstanî de zî pêvînayîşî kerdibî. Erenî ajansê ma rê qisey kerd.

Erenî da zanayene ke kurdan bi Kongeransê Tewirê Hemparî dest pê nuştişê tarîxê xo kerdo û vat: ‘’No konferans seba ke ma ardo yew ca zaf qîmetîn o û tarîxê kurdan de krîtîk o. Seba ke yewîya înan çin bîyê kurdî bi serran ameyî qetilkerdene. Nê konferansî rayîrê yewîya kurdan zî akerd. Konferansê Tewirê Hemparî yê Kurdan ê Rojawanî do seba Kongreya Neteweyîye bibo gamêka verêne. 

Netîcenameyê nê konferansî zî zaf girîng o. Kurdan konferans de pare kerd ke ê heqanê xo yê nasname, kultur û bawerî wazenê. Nê waştişê kurdan meşrû û xozayî yê. Wa hinî yewîya kurdan bêra caardene.’’

Erenî pare kerd ke Rayber Apoyî 27ê sibate de Vengdayîşê Haştîye û Komelê Demokratîkî kerdo û dimayê ci no konferans ameyo kerdene. Erenî vat: ‘’Muhtewaya nê konferansî bi xo sey vengdayîşê Ocalanî bîya. Konferans rengê caardişê vengdayîşê Birêz Ocalanî yo. Proseso ke Birêz Ocalanî bi vengdayîşê xo verê ci akerdo raşta raşte tesîrê Rojawanî kerd.’’

Erenî îfade kerd ke konferans hêdî hêdî tesîrê pêro parçeyanê Kurdîstanî do bikero û waştişê kurdanê Rojawanî waştişê kurdanê pêro parçeyan ê.

Erenî bale ante ser ke ganî Sûrîyeya newîye goreyê komelê xo yê kozmopolîtî şikl bigêra û bêra îdarekerdene. Erenî vat: ‘’Modelê Rojawanî eşkeno pêro Sûrîye rê bibo mîsal. Ganî Qanûnê Bingeyî yê neweyî de hûrmet bêro mojnayene pêro şaranê Sûrîye. Seba Sûrîye modelê kurdan rê ber alternatîfêk çin o.’’

Erenî peynîya qiseykerdişê xo de ard ziwan ke kurdanê Rojawanî xeylê bedelî dayê la ê ser kewtî.