4 welatan erşawitişê leşkeranê Tirkîya yê seba Lîbya red kerd

Wezîranê Karanê Teberî yê Îtalya, Almanya, Fransa û Îngilîstan seba ke serebûtanê peyênan ê Lîbya biercnê Bruksel de ameyî  têhet planê Tirkîya yê erşawitişê leşkeranê seba Lîbya red kerd.

Wezîranê Karanê Teberî yê Îtalya, Almanya, Fransa û Îngilîztan seba serebûtanê peyênan ê ke Lîbya de qewimîyenê biercnê Bruksel de kombîyayîşêk kerd.

 Pêvînayîşî ra dima Temsîlkarê Berzî yê Polîtîkayanê Asayîşî û Têkilîyanê Teberî yê Yewîya Ewropa (YE) Josep Borellî eşkerayîyêke daye.

Borellî ard ziwan ke her roje asta şîdetî ya Lîbya bena zêde û pare kerd ke ganî mudaxeleyê teberî biqedo û Lîbya de adirbirnayîş bêro îlankerdene. Borellî vat: "Ma planê Tirkîya yê erşawitişê leşkeran ê seba Lîbya red kenê."

Wezîrê Karanê Teberî yê Îtalya Luîgu Dî Maîoyî pêvînayîşî ra dima eşkerayîye de vat: "Cara nika Lîbya seba koçkerdişê Ewropa û terorîzmî sey gefêk a. Ganî no kombîyayîş Lîbya de biameyêne kerdene la rewşa asayîşî seba ney destûr nêdayêne. La YE do siba ra nata derheqê Lîbya de bi xo stratejîyan bikera."