Tepişteyê Zîndanê Tokatî Cebraîl Vuralî pê telefonî keyeyê xo de qisey kerd û înan rê qala binpaykerdişanê vera tepişteyan kerde. Vuralo ke lîsteya tepişteyan ê nêweşan a ÎHDyî de ca gêno da zanayene ke 8 tepişteyê nêweşî koxûşêk de arê dîyayî.

Vuralî vat: ''Semedo ke ma bimirê heman koxûşî de tepişîyenê. Ma yenê tecrîdkerdene. Îdareyê zîndanî vera ma bi hawayêkê keyfî têgêreno. Ê wazenê ma tîya de pûç bibê.''

Dadîya Vuralî Nofa Vural vera kerdişî nêrazîbîyayîşê xo mojna û vat: ''27 serrî yo lajê mi tepişte yo û 10 serrî yo Zîndanê Tokatî de yo. Tepişteyê nêweşî heman koxûşî de yê, tedawîya înan nêna kerdene. Ê wazenê nêweşîyê domananê ma bizêdîyê û bimirê. 3 mengî yo no zulm yeno kerdene. Heta lajê mi nêvejîyo teber ez do nêmira. Mi soz da ci.''

Birayê Vuralî Selîm Vuralî zî ard ziwan ke eke çîyêk bêro sereyê lajê ci mesuldar mudirê zîndanî M.K. yo. Bira Vuralî vat: '' Wa no zulm nêro qebulkerdene. Her kes wa vera tecrîdî û binpaykerdişanê heqanê tepişteyan vengê xo vejo.''