Komeleya Huqûqnasanê Seba Azadîye (OHD), Weqfa Cigêrayîşanê Komel û Huqûqî (TOHAV), Komeleya Heqanê Merdiman (ÎHD) û Weqfa Heqanê Merdiman a Tirkîya (TÎHV) semedo ke binpaykerdişê heqanê ke vera Abdullah Ocalan, Hayatî Kaytan, Emîn Gurban û Ciwan Boltanî yênê  kerdene cade bikerê rojdemê xo, 26ê temmuze de muracatê Komîteya Wezîran a Konseya Ewropa kerdbi. Tirkîya 7ê êlule de cewab dabi Mehkemeya Heqanê Merdiman a Ewropa (MHME) û îdîa kerdbi 'Îmrali de binpaykerdiş çîn o'.

OHD, ÎHD, TOHAV û TÎHVî vera vatişê Îmrali de binpaykerdişê heqan çîno nêrazîbîyayî ramojna. Rêxistinan vera îdîaya dewleta tirke Komîteya Wezîran a Konseya Ewropa cewab şawit û bale ante ser ke cewabê hukmatî de çîyêko zelal nêameyo vatene û îdîayê înan red kerdî. Rêxistinan ard ziwan ke Abdullah Ocalan, Kaytan, Gurban û Boltanî zî tede bi seyan kesî nêeşkenê veradîyayîşê bişertî ra feyde bikerê û vat goreyê rejîmê înfazî do heta mergê xo zîndan de bêrê tepiştene.

Rêxitinan qerarê Mehkemeya Heqanê Merdiman ê Ewropa yê derheqê cezaya muebetî yê binpaykerdişanê heqan zî ard vîrvistene û ard ziwan ke Tirkîya pîya bi qanûna xo qanûnanê mîyanneteweyî zî binpay kena. Rêxistinan vat dezgehê mîyanneteweyî yê ke derheqê binpaykerdişanê heqanê merdiman ê Tirkîya de qerar genê ganî peyê qeraranê xo de vindê û şirê Tirkîya ser ke nê qerarî bêrê caardene. Muracatkeran vist vîrî ke semedê veradîyayîşê bişertî ganî 25 serrî ravêrî û vat tay welatan de no wext hîna tay o. Reyna ame vîrvistene ke kesê ke yewî ra zafêr cezaya muebetê giranî genê 36 yan zî 40 serrî zîndan de manenê û vat no heqê hêvî ser o zî tesîr keno.

Rêxisitnan vist vîrî ke Abdllah Ocalan 15ê Sibat a 1999î ra nata îzolason de yo vat Rayberê Şarê Kurdî 2019 de têna 5 rey pêvînayîşê avûkat kerdî û 7ê tebax a 2019î ra nata pêvînayîşî ameyî qedexekerdene. Raporê CPTyî yê 2019î yê Zîndanê Îmraliyî zî ame vîrardene û ame vatene raporo ke 5ê tebaxa 2020î de ame  eşkerakerdene de yeno vatene ke xeylêk binpaykerdişê heqan estê û ke mekamanê tirkî rê yeno vengdayene ke wa avûkatî û merdimê tepişteyan bieşkê tepişteyan bivînê.  Rêxistinan reyna bi numeyanê madeyanê huqûqî tespît û vernayîzanê xo ra lîsteyêk zî amede kerd û veng da ke vera binpaykerdişanê heqan ê Tirkîya ganî cade çîyêk bêro kerdene.