Wekîlê verênî yê HDPyî û Endamê Komîteya Îmraliyî Îdrîs Balukeno ke Zîndanê Sîncanî yê Anqara de yeno tepiştene, badê demêkê dergî çapemenîye rê qisey kerd. Balukenî rojnameyê Yenî Yaşamî de Gulcan Derelî û Huseyîn K. Akçadagî rê qisey kerd.

Balukenî roportaj de bale ante tecrîdê vera Rayberê Şarê Kurdî Abdullah Ocalanî û grevê vêşanîye yê tepişteyan ser û vat: ''Eleqeyê tecrîd çarçewa şexsî û komelkî de qet bi normê merdimîye, wijdan, ehlaq, komel û bawrîyêke çin o. Tecrîd eksê huqûqî, mewzuatê Qanûno Bingeyî û pêkerdişê mîyanneteweyî yo. No sûc vera merdimîye yeno kerdene. Xîret û waştişê wedarnayîşê tecrîdî benê bahane ke îradeyê haştîye timî bêro ganîkerdene. Ganî pêro hêzê demokrasî, azadîye û haştîye paştî bidê grevê vêşanîye yê vera tecrîdî.''

Balukenî roportajê xo de vist vîrî ke wextê prosesê Îmraliyî de komîteya Îmraliyî pê waştişê dewlete ronîyaye ke proses bêro averberdene.

Balukenî derheqê qefilnayîşê HDPyî de zî wina vat: ''Şexsê HDPyî de yeno waştene ke sîyaseto demokratîk û sîyasetê bindestan bêrê tepiştene. Ganî xeta xoverdayîşî ya tewr hîra bêra raştkerdene, reaksîyon û nizdîbîyayîşê sîyasî, huqûqî, komelkî bêrî vînayene. Coka ganî HDP paradîgmaya xo ya rayîrê hirêyînî vejo vernî yan zî pê daşinasnayîşêkê hîna zelalî şarî îqna bikero.''

Îdrîs Balukenî peynîya qiseykerdişê xo de venga şarî da û vat: ''Ez wazena hêvîya şarê ma nêra şiknayene. Ganî roşnaya piştîya mijî nêra hewnakerdene Ez û embazê xo yê qoxuşî M. Alî Bul (Hemşaredarê Dêrsimî) şarê xo yê ercîyaye û welatperwerî rê selamanê german erşawenê.''