Serekê Şaredarîya Bajarê Pîlî ya Stenbolî Ekram Îmamoglû pîya bi cinîya xo ame Amed.  Îmamoglûyo ke Amed de eşkerayîyêk daye nê vatî:

‘‘Ê ke xo îradeyê şarî ra cor de vînenî bedelê naye do sandîq de bidê. Xespkerdişê şaredarîyanê weçînayinan nêno qebûlkerdene. Huqûq û demokrasî de cayê naye çîn o. Çew nêeşkeno îradeyê şarî yo ke sandiq ra vejîyayo nêvînayîş ra bêro.Vera naye ganî mucadele bêro girdkerdene. Ê ke welatî îdarê kenê ganî bizanê heme rayê ke erzîyenê sandiq, dîyenê kamî wa bidîyê ci ganî bêrê naskerdene. Heme weçînayenê ke sandîq ra selahîyet girewto heqê înan seypê yo. Tayî weçînayinan cîya tepiştiş nêno qebûlkerdene. No cîyakerdişo bitehlukeyo. Tewirê vera şaredarîyanê Amed, Wan û Mêrdînî tewirêko wina cîya yo.‘‘

Îmamoglûyî qiseykerdişê xo rê wina dewam kerd: ‘‘ Stenbol yan zî Amed kam partîya sîyasîye bena wa bibo, kam beno wa bibo kesêko îradeyê şarî temsîl keno tewirê ma ê vera ci nêbedilyeno. Ma mecburê ke vera neheqîye û bêhuqûqîye eşkera pêro pîya mucadele bikerê. Eke ma wîna mekerê cimatêko adîl nêno pêardene. No mucadeleyê demokrasî  û pawitişê îradeyê şarî yo. Ma hemeyan pîya dîye ke eke îrade werte ra bêro wedartene şar senî reaksîyon dano. Ma cigêrayîşê haştîye û azadîye do çi rey canêverdê. Ma na neheqîye Stenbol de hîs kerde. Demokrasî tena bajarêk de nêbena.  Demokrasî ganî Amed de,Wan de, Mêrdîn de, Stenbol de û Îzmîr de zî bibo.‘‘

Îmamoglûyî dimayê eşkerayîya çapemenîye mezelê Tahîr Elçîyo ke hetê dewlete ra amebi qetilkerdene zîyaret kerd û bado zî Şaredarîya Pêyas de bi hemşaredarê Bajarê Pîlî yê Amedî Selçûk Mizrakli û hemşaredarê Bajarê Pîlî yê Mêrdînî Ahmet Turkî pêvînayîş viraşt.