Heyetê Haştîye yê Mîyanneteweyî yo ke bi wesîleya serrgêra Komployê 15ê Sibate ame Tirkîya, Taksîm de eşkerayîyêke daye. Heyetê Îmrali sey  hem laboratuwarê zext hem zî ê demokrasîyî name kerd û vat seba çareserî ganî tecrdî bêro wedartene.

Heyeto ke avûkata heqanê merdiman Melenie Gingel a ke Îngîlîstanî ra ameye, sosyolog û antropolog Felîx John Padel o îngîlîz, wezîro verên ê edaletî yê Îzlanda û parlamenterê Konseyê Ewropa Ogmundur Janasson tede ca gênê verê bi avûkatanê Bûroyê Huqûqî yê Asrinî pêvînayîşêk viraşt û dima zî raporê binpaykerdişê heqanê  Îmraliyî yê 2019 yo ke avûkat amade kerdbi, eşkera kerd.

Avûkatanê buro ra Cengîz Yureklî nê vatî: ''Ma derheqê fikranê birêz Ocalanî de qisey kerd. Birêz Ocalan tecrîdê serê xo sey îmhakerdişê şarê kurdî hesibneno. Bi tecrîdî yeno waştene ke şarê kurdî û Ocalanî  yewbînan ra raqilnê. Rixmê naye birêz Ocalan semedê haştîye gureyeno. Dima ke badê girevê vêşanîye yew di pêvînayîşî ameyî kerdene komel de ûmidêk aferya la reyna tecrîd ame xorîkerdene.''

Deklarasyonê heyetî hetê Ogmudur Janassonî ra ame wendene. Janassonî ard ziwan ke seba ke prosesê haştîye reyna bêro destpêkerdene ê ameyî Tirkîya û vat: ''Gama verên a prosesî o yo ke tecrîd bêro wedartene. Tirkîya hetêkê pêkewtişanê heqanê merdiman ê Ewropaya û ganî goreyê înan tê bigêro. Hem bi hepskerdiş û îşkence yê vera şarî û hem zî bi îşxalê vera Rojawanî heqê merdiman yenê binpaykerdene. Coka destpêkerdişê pêvînayîşanê haştîye hewce keno. Ganî bi tewrbîyayîşê Rayberê Şarê Kurdî Abdullah Ocalanî pêvînayîşî bêrê kerdene, masaya muzakereyan bêro ronayene. Par wisar ma mesajê ey bi baldarî goştarî kerdî la dima ke 5 reyî avûkatanê xo de pêvînayîş kerd bêrê Îmraliyî reyna ameyî qefilnayene. Na mana de Îmrali hem laboratuwarê zext hem zî ê demokrasî yo. Tecrîd û binpaykerdişê heqan heme zîndanan ser o tesîr keno.  Komplo de hînî qelişî eysenê. Mehkemeya Berze ya Belçîka qerar girewt PKK û  têkoşînê kurdan  ganî sey teror nêrê namekerdene û sey cigêrayîşê heqî name kerd. Ganî pêvînayîşê haştîye reyna bêrê destpêkerdene û her kes paştî bido ci.''

Dima ra zî avûkate Melanie Gingel qisey kerd. Gingele bale ante ke ê zî binê tecrîdî de yê û vat: ''Ma zaf rey semedê pêvînayîşî muracatê selahîyetdaranê tirkî kerd la cewab ma nêdîya.  Ma hewl danê ke hetê fermî ra tayî beran abikerê. Qerarê mehkemeya Belçîya yê PKKyî zaf girîng o. Mehkeme PKK sey hetêkê fermî yê pêkewtişî name kerd. Ma pawenê ke badê na dawa, dawayê bînî bêrê akerdene û semedê pêvînayîşan newe ra gamî bêrê eştene.''