Çarçewa paradîgmaya Konfederalîzmê Demokratîkî ya Rayberê Şarê Kurdî Abdullah Ocalanî de kurdan paytextê Îngilîstanî Londen de 2 rojan Konferansê 'Komelê Azadî' serûber kerd. Konferans pê şîarê 'Ma bi ruhê xoverdayîşî bingeyê terefanê neteweya demokratîke de azadîya xo pîl bikerê' û bi hawayêkê onlineyî ame kerdene.

Îskoçya, Gal û Îngilîstanî ra temsîlkarê Melîsanê Şarî, Meclîsê Cinîyan ê PJAKî, temsîlkarê Komelê Azadî û rêxistinanê Başûr û Rojawanê Kurdîstanî bi temamî 74 delegeyî tewrê konferansî bîyî. Hemserekê KONGRA-GELî Remzî Kartal û Hemserekê KCDK-E Yuksel Koç zî tewrê konferansî bîyî.

Wendişê raporê Koordînasyonê Komelê Azadî yê Brîtanya ra dima nîqaşan dest pêkerd. Delegeyan pare kerd ke ganî Îngilîstan de karê rêxistinîye asta berze de bêra kerdene û çarçewa paradîgmaya Konfederalîzmê Demokratîkî ya Abdullah Ocalanî de Meclîsê Şarî bêrê awankerdene.

Yuksel Koçî konferans de ard ziwan ke ganî 8 hetanê Brîtanya de ê xo goreyê îdeolojîya xo rêxistin bikerê. Koçî vat: ''Sîstemo newe yê rêxistinanê ma yeno manaya azadîye û mîyanê nê sîstemî de tewr zaf paradîgmaya azadîpawitoxîya cinîyan girîng a.''

Remzî Kartalî zî da zanayene ke ganî rêxistinê kurdan ê Îngilîstanî goreyê paradîgmaya newîye rêxistin bikerê. Kartalî vat: ''Demokrasîya radîkale perspektîfê ma yo. Seba welatêkê azadî ganî ma xo pê Paradîgmaya Rayberîye rêxistin bikerê.''

Konferans pê slogananê 'Biciwîyo Serek Apo' û 'Şehîdî Nêmirenî' qedîyayî.