Hêrişê vera Partîya Demokratîke ya Şaran (HDP) û qetilkerdişê xebetkara partîye Denîze Poyraz xeylêk bajaranê Kurdîstan û Tirkîya de ame protestokerdene.

Rêxistina HDPyî ya Amedî Meydanê Dagkapi de eşkerayîye daye. Wekîlê HDPyî, aktîvîstê TJA û xeylêk temsîlkarê rêxitinanê komelî sîvîlî tewrê çalakîye bîye. Eşkerayîye de slogana '2HDP şar o şar tîya de yo'' bîye berz. Eşkerayîye de ame vîrardene ke îqtîdar HDPyî tim sey hedefî ramojneno û ame vatene ke îqtîdarî talîmatê mergî da û çeke na ey lapa. No hêriş plankerde ame kerdene. Qiseykerdoxan ard ziwan ke kiştoxê Denîze teber de yo vat: '' Vatişê dayîka Denîze ma rê talîmat o. Ma do nê bîyare ca.''

Çewlîg de zî verê banê HDPyî de eşkerayîye ameye dayene. Parlamenterê HDPyî Erdal Aydemîr, partîyijî û xeylêk kesî tewrê ci bîyî.  Eşkerayîye de pankarta‘''Qetilkarî do hesab bidê'' ameye akerdene. Aydemîrî ard ziwan ke Îqtîdar vera HDPyî her tewir hêriş keno vat: ''Nê hêrişî do çirey îradeyê HDPyî meşiknê. '' Aydemîrî bale ante tekîlîya dewlete-mafya ser û vat: ''Hukm  mudaxeleyê nayî nêkeno. Têna ling şaya HDPyî ver. Qirkerdişî do îradeyê ma meşiknê û Denîze Poyraz çirey nêro vîrakerdene.''

Dêrsim de zî hetê Hêzanê Kede û Demokrasîyî ra Kuçeyê Sanatî de eşkerayîye ameye dayene. Wekîlkê HDPyî Alîcan Onlu xeylêk kesî tewrê ci bîyî. Eşkerayî de ame vatene ke no hêriş vera heme şaran o û berpirsîyarê ci êyê ke tim HDPyî tehdît kenê.

Qezaya Depî yê Xarpêtî de zî bi çalakîyêke hêrişê vera HDPyî ame şermezarkerdene û Denîze Poyraz ameye yadakerdene.

Reyna Wan, Bismîl,Semsûr, Agirî,Dîlok,Riha, Êlih, Anqara,Mersin, Giresun,Hatay, Osmanîye û xeylêk bajaranê bînan ê Kurdîstanî û Tirkîya de şar vera qetilkerdişê Denîze Poyraz vejîya kuçeyan hêrişo ke bi destê dewlete ame kerdene şermezar kerd. Çalakîyan de ame vatene ke do qetilkarî verê şarî de hesab bibê. Şaro ke wayîrê HDPyî vejîya û vera hêrişê îqtîdarî hersê xo ard ziwan bi slogana '' Ma pêro Denîz ê'' qîra.