Merkezê Wanî û Erdîşî de serra 2011î de erlerzê bi şîdetê 7,2 û 6,5 qewimîyabî. Nê erdlerzî de goreyê doneyanê fermîyan 644 kesî merdbî û tewr tay 4 hezar kesî zî birîndar bibî. Dewleta tirke bîlançoya rastikêne heta ewro eşkera nêkerde. Goreyê doneyanê nêfermîyan Wan û Erdîş de 3 hezar kesî merdî.

Erdlerzê Wanî û Erdîşî de 30 hezar bînayî rijîyayî bi des hezaran bînayan zî texrîbatêko pîl dî. Hetkarîyê ke ameyî erşawitene  şarî rê nêameyî vilakerdene. Na hetkarîye kewte destê walî, qeymeqam, rêxistinanê AKPyî yê qezayan û şaristanan û hetkarîyî terefgîranê AKPyî rê ameyî vilakerdene. Zaf hetkarîyî zî ameyî rotene.

23ê teşrîna verêna 2011î de Erdîş de bi şîdetê 7,2 erdlerz qewimîya, 9ê teşrîna peyêna 2011î de zî bi şîdetê 6,5 Wan de erdlerz qewimîya. Erdlerzî ra 3 rojan dima komê hetkarîye yê dewlete ameyî. Şar 3 rojan ra dima binê xirbe û kerrayan ra ame vetene. La şaredarîyê HDPyî yê sey Amed, Êlih û Sêrtî mabênê 3 saetan de xo resnayî Erdîşî û tewrê xebatanê xelisnayîşî bîyî.

Bi hetkarîya şarê kurdî û dinya Erdîş, Edremît, Kalecîk, Kevenlî, Bostanîçî û Toprakkale de tewr tay 15 hezar bînayî ameyî viraştene. Dewlete seba nê bînayan tewr mesraf nêkerd la nê bînayî bi 80 hezaran bi hawayêkî zorî rotî mexdurê erdlerzan.

Seba ke mezdurê erdlerzê Wanî nêeşkayî deynê xo bidê dewlete dest na bînayan ser. Bi hezaran mexduran rê hacîz ame. 

Serekkomar Erdoganî erdlerzê Xarpêtî ra dima vatbi ''Ma Wan û Erdîş newe ra awan kerd.'' Şarê Wanî vera nê vatişê Erdoganî nêrazîbîyayîşê xo mojna û eşkera kerd ke Erdoganî çîyêk nêkerd. Şarî vat: "Erdoganî çîyêk nêkerd. Têna sereyê ma vist deynan. Ê bînayan de heqê keda Erdohanî çin o. 

Erdlerzî ra 3 rojî dima komê weşîye û xelisnayîşî ameyî. O çax partîya ma û şaredarîyanê ma hetkarîye daye ma. Erdoganî tewr hetkarîya ma nêkerde. Ma bi destê xo merg û birîndarê xo vetî.''