Meydanê Garî yê Anqara de 103 kesê ke 10ê teşrîna verêna 2014î de hêrişê vera nawnayîşê demokrasîyî û kede de wefat kerd ameyî yadkerdene.

Merasîmê yadkerdişî de keyeyê kesanê ke qirkerdiş de merdî estbî. Sereka 10 Elîm-Derî Mehtap Sakîncî Coşkun yadkerdiş de qisey kerd û vat: "Qirkerdişî ra 51 mengî vîyartî, hêrsê ma zî hîna zêdêr bî. Dewaya sucî ya vera merdimîye dewam kena. Ma reya verêne nê welatî de sucê vera merdimîye munaqeşe kenê. Dewamkerdişê hukmkerdişî seba ma keyeyan zaf girîn o. Eke ma salonanê mehkemeyan dênêkerê beno ke netîceyê ke goreyê ma nêbê do bivejîyê meydan. Destê ma de têna dosyayêka ceza esta û teqîbkerdişê aye ra ber çareyêka ma çin a.''

Coşkune îfade kerd ke heta kiştoxê Qirkerdişê 10ê Teşrîna Verêne nêrê cezakerdene ê do têkoşînê xo dewam bikerê.