Semedê cinîyan ê şorişgêran ê kurdan Sakîne Cansiz, Fîdane Dogan û Leyla Şeylamez ê ke 9ê çeleyî de paytextê Fransa Paris de hetê dewleta tirke ra ameyî qetilkerdene, Dêrsim, Mereş û Mersîn de aktîvîteyê vîrardişî ameyî organîzekerdene.

Dêrsim

Têgêrayîşê Cinîyan ê Azadan (TJA) û endamê Meclîsê Cinîyan ê HDPyî yê Dêrsimî semedê vîrardişê Cansize aktîvîteyêke organîze kerde. Hemsereka Partîya Herêmanê Demokratîkan (DBP) Salîha Aydenîz Wekîla HDPyî ya Mûşî Şevîne Coşkun zî tewrê aktîvîte bîyî. Şevîne Coşkun a ke aktîvîte de qisey kerd vat bi Qirkerdişê Parisî têkoşînê cinîyan hedef ame girewtene la ma do rêçê şehîdanê xo de têkoşînî xurt bikerê. Salîha Aydenîz zî vat rixmê heme qirkerdişan şarê ma verê înan de çok nêda. Ma do têkoşînê embazanê xo yê ke Parîs û Silopî de ameyî qetilkerdene, tacîdar bikerê. Badê aktîvîteya ke banê partî de  ame kerdene gorê Cansize ame ziyaretkerdene.

Mereş

Fîdane Dogane zî Mereş de gorê ci ser ameye vîrardene. Parlametera HDPyî ya Êlihî Ayşe Acar Başaran, îdarekarê partîye yê Mereş, Riha û Semsûrî, aktîvîstê Têgêrayîşê Cinîyan ê Azadan (TJA), Mayê Haştîye û xeylêk kesî tewrê ci bîyî. Goristan pê wesayîtanê zirxinan ê polîsan gerîya binê ablûqa.  Semedê pankata ke sero fotografê hîrê cinîyan  sîyasetmedaran estbî hemwelatijê bi nameyê Nuri Çul, İbrahim Usta û Ahmet Taş ameyî destendkerdene. Ayşe Acar Başaran a ke aktîvîte de qisey kerd vat bi qirkerdişî ame waştene ke vernîya têkoşînê cinîyan bêro girewtene la a roje ra nata têkoşînê cinîyan ê kurdan hîna xurt bi.

Mersîn

Mersin  de zî endamanê Meclîcê Cinîyan ê HDPyî yê Mersin û Adana  waşt ke Leyla Şaylemez  gorê ci ser bîyare vîrî. La seba ke 4 leşkerê tirkî yê ke vizêr Rojawan de merdî înan rê di hebî nê goristanî de ameyî definkerdene vîrardiş nêame kerdene.  Virardiş banê HDPyî yê Mersin de ame kerdene. Parlamenterê HDPyî Tulaye Hatimogullari û Muazzez Orhanî zî tewrê ci bîyî. Qiseykerdişan de ame vatene ke Sakîne Cansiz, Fîdane Dogan û Leyla Şeylamez rayberê têkoşînê cinîyan ê û do çirey tarîxê kurdan de nêrê vîrrakerdene.Pakize Nayir, Sêvê Demirû Fatma Uyar ê ke Silopî de ameyî qetilkerdene ê zî amyî vîrardene.