Hemserokê ÎHD‘yî yê Şubeyê Mêrdînî Fevzî Adsizî derbeya qeyûman ê şaredarîyanê pîlan ê Amed, Mêrdîn û Wanî ser o qisey kerd.

Adsizî vat: “Qeyûm vera peymananê mîyanneteweyî yo, wezîfeyê mesuldar û hemserekanê şaredarî bi awayekê neqanunî dest ra ame girewtene. Nê gamê winasîyê nehuquqî dest îradeyê şarî ser nayîş o. Gore ma ganî gamê raver nê kerdişanê nehuqîqîyan ra fek bêro veradayene. Ganî şaredarî game raver bêrê karê xo ser.''

Adsizî reyna dîyar kerd ke tewr yew gama şaredaranê ke teberê qanunî de ameya eştene çin a û wina vat: “ Qeyumî birrê ke meclîsê pêroyî de gore bi qanunan ameyê girewtêne xo rê kenê mane û înan sey birranê nehuqîqîyan nirxnenê.”

‘Ê yê ke Vejîyenê Kuçeyan Ney La Polîs Sucdar o‘

Adsizî va “Vera qeyûman seba ke şar îradeyê xo rê wayîr vejîyo, vejîyeno kuçeyan û çalakîyan keno û bi nayê heqê xo gurenenê. Eke şarî îradeyê xo sandiqe de nîşan dayo û no îradeyê xo bi awayekê nehuquqî dest ra ameyo girewtene, protesto heqê xo yo xozayî û qanunî yo.  Qanunê bingehînî de heqeko winasî esto, astankerdişê gurenayîşê nê heqî eslê ci de suc o. Na hende tadayî û zordarîya ke polîs şarî rê keno ganî bîyamêne cezakerdene la kesê ke heqê xo gurenenê yenê cezakerdene. Nê pêro gamê antîdemokratîk ê.”

‘Ma Do Bikê Rapor‘

Hemserekê ÎHD‘yî yê Şubeyê Mêrdînî  Fevzî Adsizî vat ke “ma do pêro îxlalkerdişanê heqan teqîb bikerê. Ma do binpaykerdişanê heqanê ke heta nika ma rê dayîyê zanitene rapor bikerê. Xebatê ma hîna zî dewam kenê. Wezîfê ma yo ke ma ganî nê gaman deşîfre bikerê û şarî rê biderê zanayene.