Parlamentera HDPyî ya Sêrtî û Endama Komîsyonê Qanûnê Bingeyênî û Heqê Merdiman ê Meclîsî Merale Daniş Beştaş derheqê selahîyeto ke dîyayo pawitixanê (bekçî)  taxe û sûkan ke sey polîsan tê bigêrî de qisey kerd.

Îqtîdarê AKPyî Şarî ra Terseno

Beştaşe vist vîrî ke no talîmatê Erdoganî yo û vat: ''Bado ke Erdoganî vat: ''Semedê asayîşê bajaran hêzê asayîşî têna nêvejenê'' rixmê qeraranê hukmî AKP û MHPyî cade dest pê amadekerdişê qanûnêk kerd. Qanûno ke selahîyetê polîsan dano pawitoxan ame qebulkerdene. No yeno na mana ke AKP xo asayîş de hîs nêkeno û şarî ra terseno. Goreyê qanûnê neweyî pawitoxî do bi îmtîhanê Wezaretê Karanê Zereyî bêrê girewtene û binê serbanê teşkîlatanê asayîş û cendirmeyan de berê îstîhdamkerdene. Pawitoxê taxe û sûkan hînî eşkenê hêrişê çalakîyanê protestoyan bikerê, nasnameyan biperse, cigerayîşê gincanî bikerê, wesayîtan kontrol bikerê û çeke bişuxulnê. Reyna eke raştê xoverdayîşî bêrê eşkenê zor zî bişuxulnê. Kelemçe, cop, gazê ke hesran anê war, kutikî û astorê ke polîsî şuxulnenê pawitoxî zî hînî  eşkenê bişuxulnê.''

Problemê Asayîşî Ney Problemê Demokrasî Esto

Beştaşe bale ante rejîmê yew merdimî ser û vat: ''Qala ke fekê Erdoganî ra vejîyena bena qanûn. Pawitoxan  zî keno mîyanê dewlete polîsan ke sîstemê asayîşî hîna bibo hîra. La herçî ra ver Tirkîya de xora problemê şarî yê asayîşî çîn o, problemê demokrasî esto. Şar demokrasî wazeno. Îqtîdar wazeno xo bipawo. No semedê pawitişê şarî nê semedê pawiitşê otorîteyê îqtîdarî yeno kerdene. Polîs xora hewcedarî ra zafêr ê. Eke ez xelet nîya hûmara pawitixan 11 hezarî ravêrt. Xora tewirê pawitoxan ê vera şarî problem bi. Nika naye hîna kenê xurt.  Xeylêk cayanê dinya de bîyayîşê winayên ameyî kerdene. Hemeyan de zî îqtîdaran no semedê asayîşê xo kerdî. Demo nêzdî de hukmî qerarê '' Pawitox nêeşkno nasname biperse'' dabi la rixmê naye no qanûn ame qebûlkerdene. Tirkîya de hukm goreyê îqtîdarî tê gêreno. Hînî no çîyêko mîyan nîyo. Talîmatê Erdoganî sey qanûnî yenê caardene.''