Fakulteya Tibî ya Kocelî ra 9 doktoranê pîsporan raporo ke dayo Aysel Tugluk de yeno vatene ke a nêweşa demansî ya û ganî zîndan de mero tepiştene. Rixmê nê raporî Dezgehê Tibê Edlî (ATK) înfazê Tugluke peyde nêerzeno. Demê peyênî de xeylêk tepişteyan dinyaya xo bedilnaye. Bi seyan tepişteyî zîndanan de yê û tedawîya înan nîna kerdene. Avûkatanê Aysele Tugluk ra Veysî Eskîyî derheqê rewşa muwekîla xo dir ANFyî rê qisey kerd.

Eskîyî vat: ''Tugluke rîyê hêrişê vera cenazaya dayîka ci Hatune Tugluk zaf qehrîyaye û pîya bi şertena zehmetan ê zîndanî na nêweşîye girewte. Pede pede rewşa aye xidar bîye. Bado ke Tugluke Nêweşxaneyê Unîversîte yê Kocelî de ameyî muayenekerdene raporê zîndan de nêeşkena bimane dîya ci la ATK rixmê nê raporî vat a eşkena zîndan de bimano. No rapor fîneno çiman ver ke dezgeh senî sîyasî qeraran geno. Seba ke Aysele Tugluk nêwaşt bi rewşa weşîya xo bibo rojdem ma zî sey avûkatanê ci no eşkera nêkerd. La hinî Tugluke têna nêeşkena miqatê xo bo.

 Nika Tugluke pîya bi di embazanê xo manena û ma reyna prosesê raporê bînî daye despêkerdene. Hekîmê ATKyî goreyê wezîfeyê xo tênêgêrenê. ATK semedê tepişteyanê nêweşan bîyo korîdorê mergî û nuqtaya kor. Ganî rayapêroyîye na babete de dahîna hîsgêr bo û heme dezgehê weşîye û huqûqî naye bikerê rojdemê xo yo verên. Ma dezgehanê heqî ameyî têhet û derheqê meseleya ATKyî de muneqeşe kerd. Ma do raporanê ATKyî dezgehanê mîyanneteweyî dir pare bikerê û tesbît bikerê ATK heyetê ko xoser nîyo. Ewro ra tepîya nîno qebulkerdene ke têna ATK derheqê tepişeyan de qerar bigêro. Ma pê bawer ê ke Yewîya Tabîban ê Tirkan (TTB)  do bikewo dewre û bi hekîmanê xoseran nê raporan kontrol bikero.''