Hetkarê Wezaretê Karanê Teberî Faruk Kaymakçiyî Konseya Heqanê Merdiman a YNyî de vat ke semedo ke Meydanê Galatasarayî de 'turîstî pê Mayanê Şemeyî qayîl nîyê' çalakîya înan ameye qedexekerdene.
Konseya Heqanê Merdiman a Neteweyanê Yewbîyayeyan (NY) Cenevre de rewşa Heqanê Merdiman a Tirkîya cigêraye. Selahîyetdarêkê Heyetê NYyî persa ke çira hewteyê 700. ra nata Meydanê Galatasarayî de çalakîya Mayanê Şemeyî ameye qedexekerdene.
Hetkarê Wezîrê Karanê Teberî Fark Kaymakçiyî ard ziwan ke semedo ke 'turîstî pê Mayanê Şemeyî qayîl nîyê' çalakîya înan ameye qedexekerdene. Kaymakçiyî îdîa kerd ke Mayanê Şemeyî bi hawayêkê bêdestûrî çalakîye kerdêne.
Eşkerayîya Kaymakçiyî ra dima Mayanê Şemeyî twitter de vera vatişanê Kaymaçiyî nêrazîbîyayîşê xo mojna. Mayanê Haştîye bi fotografêkî da zanayene ke Meydanê Galatasarayî têna Mayanê Şemeyî rê ney, hemwelatîyan û turîstan rê zî qedexe yo. Mayanê Haştîye vat: " 76 hewte yê ke 'cayo turîstîk' hetê polîsan ra yeno dormegirewtene.''
